Exam kaihhnawiha zirlai rilru tâwt tihziahawm dan tur Aizawlah sawiho

Mizoram State Commission for Protection of Child Rights (MSCPCR) leh School Education department-te chuan National Commission for Protection of Child Rights (NCPCR) bultumin nimin khan Aizawlah ‘Pariksha Parv 2.0’ an buatsaih a; rilru tâwt leh hrehawm nei loa zirlaite’n exam ṭha taka an hmachhawn theih dan tur sawiho a ni.

Sawihonaah hian mithiamte’n exam kaihhnawiha zirlaite’n rilru tâwt lutuk vanga harsatna an tawh theih dan leh a sutkian dan turte an sawifiah a; NCPCR consultant Ratna Saxena, Mizoram University-a Psychology department hotu Prof. HK Laldinpuii Fente leh Aizawl Civil Hospital-a psychiatrist Dr Ruth Lalmuanpuii ten sikul principal leh headmaster-te leh zirlai kal khawmte an zirtir.

Mithiamte sawi danin, India ram hmun dangah zirlai tam tak exam kaihhnawih rilru hah vanga mahni intihlum awm ṭhin mah se, Mizoramah chuan harsatna lian tâwk an la awm lo a, chutih rualin, chhan hrang hrang vanga rilru lama harsatna tâwk zirlai an awm fo tawh thung.

Exam kaihhnawiha rilru hah leh tâwt pumpelh turin zirlaite, an nu leh pate leh zirtirtute’n mawhphurhna an nei ṭheuh a; rilru tâwt lutuk tur laka inveng turin thil thlir dan her rem thiam a ṭul thute an sawi.

Sawihona hi MSCPCR chairperson Sangzuali Vanchhawng-in a kaihruai a; a hmanpuitu School Education secretary Esther Lalruatkimi chuan, naupangte chu thil ti dik vek tura beisei chi an nih loh thu sawiin, an tlin tâwk baka nasa taka nawr tur an nih loh thu leh, zirlaite’n nuam ti taka an zirlai ṭhahnemngai taka an zir theihna turin zirna boruak ṭha siamsak an ṭul thu a sawi.

School Education Secretary hian zirna kaihhnawiha a mamawh apiangte’n an biakpawh theih tur RTE Helpline a tlangzarh a; Helpline telephone number chu 60098 88804 a ni a, zirna kaihhnawiha harsatna nei leh thu thlen duh nei tan engtik lai pawha an biakpawh theih tura ruahman a ni.