Mizoram Governor 22-na atan Hari Babu Kambhampati ruat a ni

President Ram Nath Kovind chuan Mizoram Governor atan nimin khan Hari Babu Kambhampati (68), Andhra Pradesh a ruat a, Mizoram larsap 22-na tur a ni.

President hian nimin khat state pali - Mizoram, Himachal Pradesh, Karnataka leh Madhya Pradesh governor thar turte a ruat a, Mizoram larsap atan Hari Babu Kambhampati a ruat a ni. Hetih lai hian, Governor ni lai PS Sreedharan Pillai chu Goa governor tura ruat a ni. PS Sreedharan Pillai hi October 27, 2019 khan Mizoram governor atan ruat a ni a, November 5, 2019 khan lakluh a ni.

Governor pisa aṭanga Vanglaini thu dawn danin, Mizoram governor ruat thar thu hi President website aṭang chauhin Governor office-in an la hria a, lak luh hun tur hriat theih a la ni lo. Larsap ni lai PS Sreedharan Pillai chu Mizorama a awm loh lai a ni.

Larsap thar tur Hari Babu Kambhampati hian Andhra University aṭangin master degree leh doctor of philosophy a zo a, chumi hnuah he university-ah hian a thawk a; associate professor a nih laiin politics khel turin kum 1993 khan a hna aṭangin a báng.

Hari Babu Kambhampati hi kum 1999 khan Andra Pradesh MLA atana thlan tlin a ni a, BJP Legislature Party leader a ni. Kum 2014 khan Lok Sabha MP atana thlan tlin a ni leh a, an state BJP president pawh a lo ni tawh ṭhin.

Mizoram hian union territory a nih chhung, kum 1972 aṭanga 1986 thlengin lieutenant governor panga a nei a, state a nih hnu, kum 1987 aṭangin governor 21 a nei tawh. Hiteswar Saikia chu lt. governor leh governor a ni kawp.