PHE-in tui pump kháwl thlâk dawn; Aizawlah tui sem a khaihlak dawn

Aizawl khawpui tuia châwmtu Tlawng lui aṭanga Tuikhuahtlanga tui pek chhohna, Greater Aizawl Water Supply Scheme (GAWSS) Phase-II tui pump khawl, Dihmun­zawla mi chu Public Health Engineering (PHE) department chuan July 13-17, 2021 chhungin kháwl tharin an thlak dawn a, Aizawla tui sem a khaihlak dawn avangin mipui hriatthiamna an ngen.

PHE department hotute chuan Vanglaini palai zawhna chhángin, tui pump kháwl aṭanga tui pût nasa avangin Tuikhuahtlanga thleng tur tui eng emaw zat a thlen theih loh phah tih an sawi a, "Hun eng emaw chen tui tlêm avangin tui sem a khaihlak a, mipui mamawhna a sàn avangin ṭhál laiin kháwl kan thlak ngam lo. Tunah chuan fûr ruahtui a tlâk ṭan tawh bakah, tui sem a pangngai leh tawh avangin a thara thlak kan tum ta a ni," an ti.

Tarlan tawh angin, GAWSS Phase-II hi ni khata tui litre nuai 240 pump thei tur leh mi 3,00,000 vel châwm thei tura duan a ni. GAWSS Phase I leh II hi a kháwl leh hmanruate duhthusam a nih tawh loh avangin a tìra ruahman anga tam an pump thei lo a, ni khatah tui litre nuai 250 vel an pump a; hmun hrang hrangah tui pût a awm ṭhin avangin tui pump chhuah zawng zawng aṭanga 70% vel bak mipui hnenah a thleng lo a ni.