KHAWTHLIR

Art Workshop
IPR department leh Mizoram Art Development Society (MADS) chuan nimin khan Online Art Workshop an buatsaih ṭan a, ni li a awh dawn. Workshop-ah hian Mizoram chhung leh páwna MADS member artist mi 60 leh associate member mi 14 an tel a ni.

Heroin leh mi 3 man
Excise & Narcotics department leh BSF-te ṭang dun chuan July 5, Thawhṭanni chawhnu dar 2:30 khan KDZK Road, Kawrthah, Mamit district-ah heroin gram 125.70 (hawng 10) leh a neitua puh mi pathum - Monica (19) d/o Davida, Lalthangmawia (33) s/o Chitro leh Chawngzika (28) s/o Doikhimoni, New Eden, Mamit district nia inchhálte an man. Mi pathumte lakah NDPS Act, 1985 tlawhchhanin thubuai ziah luh a ni.

BJP-in tanpui
BJP, Mizoram Pradesh president Vanlalhmuaka chuan nimin khan West Phaileng Village Task Force-te a tlawh a, ei leh in tur leh Covid-19 dona hmanrua eng emaw zat a pe. Vanlalhmuaka chuan, India ramah Covid vaccine pek rûnpui chak taka kalpui mek a ni tih sawiin, "Mizoramah pawh sorkar laipui hmalaknain vaccine pek mek a ni a, vaccine hi Mizoram mipui la thei chin chuan la vek turin ka ngen che u a ni," a ti.

Thisen pe
Mamit Venghlun Branch YMA chuan nimin khan an kum 75-na pualin Mamit District Hospital tan thisen unit 21 an pe a, a petute chu mipa 15 leh hmeichhia paruk an ni. Thisen hi Branch Committee member-te'n an pe a, Mamit AVDB leh damdawi-in thuneitute'n blood bank-in a mamawh tâwk nia an hriat zat an pe a ni.

Bilkhawthlirah in kâng
July 5, Thawhṭanni zan dar 10:30 vel khan Bilkhawthlira Agriculture department quarters, Tlangkhumi (67) te chhungkaw luah lai chu bungraw chuh hman lohin a kâng. Thu dawn danin, in hi a bang cement concrete leh a chung rângva a ni a, a kan laiin Tlangkhumi te chhungkua an awm lo. Bilkhawthlir Kualmawi Branch YMA chuan kângmei tuartute chênna atan nimin khan quarters ruak dang an thawm ṭha a ni.