Kàwlbêm pa kut thlaktua puh Mi 7 mante chhui chiang mek
Kàwlbêm khaw pa Daikhanlama thihnaa mawhphurtua puh Ngopa khaw mi pasarih chu police-in an man tawh a, mawhphurtu an ni ngei em tih police-te'n an chhui chiang mek.
Daikhanlama thihna chungchangah hian police-te chuan July 5, Thawhṭanni khan Ngopa Ruihhlo Do Pawl hruaitu zinga mi mipa panga leh hmeichhe pahnih, an vaiin mi pasarih an man a; Court-a an hruai hnuah Saitual district-in jail an la neih loh avangin Aizawl District Jail leh Central Jail-ah dah luh an ni.
Vanglaini palai zawhna chhángin Saitual police hotute chuan, mi pasarihte chu Daikhanlama'n kut a tawrh ṭuma awm vekte chu an nih ngei thu an sawi a, "Kutthlaktu tak an ni ngei em tih kan chhui chiang zel dawn a ni. Mawhphurtu nia an insawi chuan kan man phawt a ngai a, thil thlen dan kan chhui chiang zel ang," an ti.