AMC-in state aṭanga a dawn tur tihniam : Central aṭangin sum dawn thuai beisei

Aizawl Municipal Corporation (AMC)-in State Finance Commi­ssion rawtna anga kum 2021-22 chhunga sum an dawn tur chu Covid-19 avangin tihhniam a ni. AMC hotute chuan, sorkar laipui aṭangin sum an hmuh thuai an inbeisei thu an sawi. Kum 2021-22 AMC budget chu cheng vbc. 77.83 a ni.

Vanglaini palai zawhna chhangin AMC executive councillor (i/c finance) Lalringliana chuan, State Finance Commission rawtna anga state sorkara chhiah tling­khawm aṭanga AMC-in sum a hmuh tur chu tihhniam a nih thu a sawi a, "Tihhniam ngei ngei a ngaiah kan ngai. Covid-19 avangin state sum dinhmun a ṭha lo a, chhiah tlingkhawm pawh a nghawng. Hei hi chu tih loh theih loh thilah kan ngai," a ti.

AMC-in kum 2021-22 chhunga state sorkara chhiah tlingkhawm aṭanga sum an hmuh tura an beisei, AMC budget-a an ruahman chu cheng vbc. 16.99 a ni.

AMC sum hmuhna lian ber 15th Finance Commission Grants aṭanga hmuh tur cheng vbc. 34 aṭangin eng emaw zat hmuh thuai an inbeisei thu sawiin Lalringliana chuan, "Sum hi sanction la hun chiah lo mah se, a hun hmain sanction hmuh kan inbeisei. Central aṭanga kan sum hmuh turah hi chuan Covid-19 avangin harsatna kan tawh loh kan ring," a ti.

Lalringliana sawi danin, kum 2020-21 chhung khan Covid-19 léng mah se 15th Finance Commission Grants sum an hmuh tur an hmu kim thei a ni. Chutih laiin, hna thawh mumal theih a nih loh avang leh Covid-19 vanga sum din­hmun a ṭhat tâwk loh avangin hna thawk ṭhate'n an dawn ṭhin perfo­rmance grant chu India rama municipal corporation/ council zawng zawngin an dawng lo.

Property tax lamah Covid-19 hripuiin nghawng a neih dawn leh dawn loh an la hriatthiam loh thu sawiin Lalringliana chuan, "October vel aṭanga khawn ṭan ṭhin a ni a, khawn a la hun loh avangin hripuiin nghawng a neih dawn leh dawn loh hriatthiam a har," a ti.

Kum 2021-22 AMC budget cheng vbc. 77.83 zingah AMC-in a thawh chhuah tur cheng vbc. 6.85 a tel a; chu'ngte chu - property tax-ah cheng nuai 350, rental income-ah nuai 17.50, fees & user charge-ah nuai 207, sale & hire charge-ah nuai 50 leh bank interest nuai 60 a ni.

Ruahman lawk loah sum an hman nasat thu sawiin Lalringliana chuan, "Bawlhhlawh paihna atan ruahman lawk loah sum a kal nasa hle. Covid Care Centre, Community Covid Care Centre leh quarantine na hmuna bawlhhlawhte kan paih vek a, hei hian sum a heh hle," a ti.