Assam police inhnuhdawh loh chuan Inbiak tum ṭhulh turin sorkar ngen
MZP chuan thuchhuah siamin, July 9, 2021-a New Delhi-a Mizoram leh Assam chief secretary-te ramri chungchanga inbiakna neih tur chu Mizoram chhung aṭanga Assam police-te an inhnuhdawh hma loh chuan ṭhulh rih ni se an duh thu an tarlang.
MZP chuan, Vairengte bul Aitlanga Assam leh Mizoram sorkar hmalakna an ngaihven reng tih sawiin, "June 29, 2021-a Assam police-te’n Mizoram chhung Vairengte ram Aitlanga hma thar la a, Mizote huan an suasam leh inbenbel tuma hma an la hi kan ngai thutak hle a ni," an ti.
Tuna Assam sorkarin hma thar an lakna leh an inkulhna Aitlang chu BEFR 1875 ramri chhung a nih avangin, Assam police-te chu a rang thei ang bera Mizoram aṭanga ûm chhuak turin MZP chuan Mizoram sorkar an ngen.
MZP chuan, Mizoram chhung aṭanga Assam police an inhnuhdawh hma loh chuan Assam sorkar chu eng level-ah pawh inbiakna neihpui lo turin Mizoram sorkar an ngen a; "Assam police-te hi kan ram aṭanga an inhnûkdâwk duh lo a nih chuan nawr chhuak mai turin sorkar kan phût a ni," an ti.
MZP chuan, Assam police-te’n tun hnaia Aitlanga hma thar an lâkna hi Mizoram chhung dik tak, Bengal Eastern Frontier Regulation (BERF) 1875 ramri chhung a nih thu sawiin, "BEFR 1875 ramri lo hi Mizote’n Assam state nen ramri dang kan nei lo tih hi Mizo mipui dinna a ni," an ti a; ramri humhalh chu ṭhangtharte kuta innghat a nih avangin ramri humhim ngam loh chu hnam phatsanna tluka an ngaih thu an sawi.
Hun hmasa lamah BERF 1875 ramri humhalh turin theihtawp an chhuah tawh ṭhin tih sawiin MZP chuan, "Thisen hial chhuaka hmalakna pawh kan lo nei tawh. Mizoram-Assam ramri chungchangah hian June 28, 2021 khan Delhi-ah Home Ministry Joint Secretary hnenah MZP President hoin memorandum thehluh a ni," an ti.
MZP chuan, MNF kaihhruai sorkara Council of Minister meeting-in July 8, 2019-ah BEFR 1875 ramri chu Mizoram ramri atan pawma thutlukna an siam tawh chu lawmawm an tih rualin, thutlukna bawhzuia ramri humhalh tura sorkar hmalakna erawh a chak tâwk lo hlea an hriat thu an tarlang.