MLA-in zirlai tiṭhate a lawmpui

Tuirial bialtu MLA Andrew H Thangliana chuan tun hnaia HSLC leh HSSLC result chhuaka a bial aṭanga top 10-a lang mi pali hnenah nimin khan lawmpui nan smartphone a hlân. Tuirial bialah hian HSLC-ah parukna, HSSLC Arts-ah parukna leh pakuana leh, Science-ah 10-na an awm a ni.

Andrew H Thangliana chuan, a bial aṭanga HSSLC leh HSLC-a top 10-a lang pha mi pali an awm chu a lawm thu leh chhuanawm a tih thu a sawi a, "Covid-19 avangin class kal theih a ni lo a, online class hmangin lehkha zir a ni ṭhin a, chumi atan chuan smartphone-te hi ṭangkai taka in hman ka beisei," a ti a; zirlaite chu ram leh hnam innghahna tlak ni tura inzir chhuah tum turin a chah.

MLA Andrew H Thangliana hian a bial chhunga hmar tlangdung khaw paruk - Lungdai, Sentlang, Nisapui, Lungmuat, North Chaltlang leh Bukpui khuaah ei leh in tur leh hripui dona hmanraw chi hrang hrang a hlan bawk.