ASF vangin vawk 9,859 a thi tawh : District tinah ASF vanga thi a awm

Vawk pùl hri, African Swine Fever (ASF) chu Mizorama district tinah a léng tih finfiah a ni tawh. Nimin thleng khan Mizorama khua/veng 162 chu ASF lènna (infected area)-ah puan a ni tawh a, chu'ngah chuan ASF vangin vawk 9,859 a thi tawh.

Animal Husbandry & Veterinary (AH&Vety) department hriatpuinain ASF infected area 162 zinga 36-ah vawk 1,191 suat (cull) a ni tawh a, ASF infected area páwn lam khua/veng 11-ah vawk 105 suat a ni tawh bawk.

March 21, 2021 aṭanga nimin thleng khan infected area-a puan loh district 11-a khua/veng 89-ah chhan hriat lohin vawk 604 a thi tawh.

Aizawl district chu ASF infected area tamna ber leh hri vanga vawk thi tamna ber a ni a, Mizoram puma infected area-a puan 162 zinga 52.46% leh ASF vanga vawk thi zinga 38.07% chu Aizawl district-a mi a ni.

Aizawl district-a ASF infected area 85 zinga 61 chu Aizawl khawpuia vengte a ni a; Aizawl district-ah hian infected area-a puan ni lo khua/veng 13-ah nimin thleng khan vawk 180 a thi tawh. Infected area zinga 24 chu Aizawl khawpui páwna khuate a ni thung.

Lunglei district-a Lungsen khua chu Mizorama ASF vanga vawk thi tamna ber a ni a, nimin thleng khan vawk 757 a thi tawh.

AH&Vety department chuan chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin mipui an ngen a ni.