Ramri hnaiha police tam zawk awmna Siam turin Mizoram sorkar an phût
Joint Action Committee on Inner Line Forest Demand leh political party leh tlawmngai pawl aiawhte chuan nimin khan resolution siamin, a rang thei ang bera Mizoram leh Assam ramri hnaihah police tam zawk awmna tur hmunpui siam turin Mizoram sorkar an phût.
Pawl hrang hrangte hian nimin khan MZP Conference Hall-ah Mizoram ramri chungchang an sawiho a, resolution an siam a ni. An resolution zingah Mizoram leh Assam ramri hnaihah police tam zawk awmna tur siam thuai phûtna te, dan bawhchhetua an ngaih Assam sorkar lakah July 21, 2021 hma ngeia action la tura India sorkar phûtnate a tel.
Meeting resolution ṭhenkhat
. Mizoram leh Mizo hnam a dam a, a him theih nan Mizoram sorkarin a rang thei ang berin Schedule Cast and Schedule Tribe (prevention of Attrocities Act) enkawltu tur leh dan lekkawhtu tur officer ruat thuai rawh se.
. Mizoram Inner Line Forest chungchanga Assam lamin buaina an siam emaw, an rawn luh a pianga kan police-te'n a hmun hma an thlen zung zunga hma an lak vat theih nan kan sorkar hian Mizoram leh Assam ramri hnaihah police tam zawk awmna tur hmunpui a rang thei ang berin siam rawh se.
. Assam sorkar hian a rang thei ang berin a police-te Mizorama a rawn dah leh bu a khuartir hi la chhuak rawh se, a la chhuak lo a nih chuan eng buaina pawh thleng se Mizoram leh Mizo mipuiin mawh an phur lo ang.
. Home Ministry kaihhruaina hnuaia status quo maintain tura tih hi Assam hian vawi tam tak a bawhchhe tawhin a zahlo em em a, he thutlukna awm sa an zah lohnaah hian India sorkar hian July 21, 2021 hma ngeiin Assam sorkar chungah action la rawh se.
. Assam sorkar hian vawi tam tak officer leh police-te rawn tir lûtin Mizorama Mizote huana mi thlai leh thlámte an tihchhiatah zangnadawmna Assam sorkar leh India sorkar hian pe vat turin kan phût.
. Assam sorkar hian Bangladesh aṭanga lo lut India khua leh tui ni lo (illegal migrant)-te tan ram zawnsak tawh lo turin kan ngenin kan hriattir a ni.
. Mizoram leh Assam chief secretary-te inbiakna turah, all political parties leh all NGO joint memorandum pêla thil engmah ti lo turin kan Chief Secretary kan ngen.