Kum 2017-ah END-in MLPC Act Hnuaiah thubuai 1,305 an ziak lut
Excise & Narcotics department (END) chuan kum 2017 chhung khan rakzu litre 16,616.035 leh sap zu ûm puitling ûm 4,488 leh a chanve ûm 8,040 an man a; Mizoram Liquor (Prohibition and Control) Act, 2014 hnuaiah mi 1,079 manin, thubuai 1,305 an ziak lut.
END hian nimin khan an commissionerate conference hall-ah review meeting an nei a; meeting-a an tarlan danin, January-December 2017 chhung khan rakzu litre 16,16.035 bakah, zu bilh lai ṭin 36,361 an man a, zu siamna dawidim kg. 23.050 an man bawk.
Sapzu (Indian made foreign liquor) ûm puitling (ml. 750) ûm 4,488 leh in ṭhen tawh ûm 12 an man a; a chanve ûm (ml. 375) ûm 8,040 leh in ṭhen tawh ûm 11 manin, ml. 180 ûm pahnih an man. Ram dang aṭanga lak luh sapzu ûm 14 an man a; beer bûr (can) lian ber chi ml. 650 bûr 249, litre chanve (ml. 500) bûr 7,138 leh ram dang aṭanga lak luh beer bûr 2,736 an man bawk a ni.
Zu man kaihhnawihah hian mi 1,079 man an ni a, chu'ng zinga mi 1,305 chu MLPC Act leh Mizoram Excise Act (ME Act) 1973 hnuaiah thubuai siamsak an ni. ME Act bik hnuaiah mi 256 an man a, chu'ng zinga 233 chu thubuai an siamsak. Zu kaihhnawihah vêk hian bêl 279, plastic bûr panga, two wheeler paruk, three wheeler panga leh LMV 28 an man tel a ni.
END hian kum 2017 chhung khan heroin kg. 6.035, ganja kg. 391.968, ganja kûng 4,127, Nitrazepam mûm 396, Alprazolam mûm 5,223, Tramadol mûm 1,506, khuh damdawi bûr 1,601, Dextropropoxyphene mûm 4,034, Methamphatamine mûm 13,400 leh Pseudoephedrine (khehpuam) mûm 1,59,471 an man.
Damdawi leh ruihhlo kaihhnawihah hian NDPS Act hnuaiah mi 488 an man a, chu'ng zinga 407 chu thubuai an siamsak a ni.