Hindi zirtirtute dinhmun la chiang lo

Mizorama Centrally sponsored scheme (CSS) hnuaia Hindi zirtirtute awm zel dan tur sorkar laipuiin Mizoram sorkar hnenah a la hriattir lo a, Mizoram sorkarin sorkar laipui thu an nghâk rih.

Vanglaini palai zawhna chhanga School Education minister H Rohluna sawi danin, CSS Hindi teacher-te awm zel dan turah hian sorkar laipuiin engmah a la hriattir lo a, sorkar laipui thu an ngaichâng mek a ni. Sorkar laipui aṭanga thupek an dawn loh chuan Mizoram sorkar chuan CSS Hindi teacher-te chungchangah tih theih a nei lo.

Mizorama CSS Hindi zirtirtute term hi February 2017 khan a tâwp a, zirtirtute chuan rawih zawm phûtin ṭum eng emaw zat lungawi lohna an lantir tawh. Mizoram sorkar ruahmannain zirtirtute leh NGO hruaitute'n sorkar laipui an dawr tawh bakah, Mizoram sorkar pawhin rawih zawm an nih theihna atan sorkar laipuiah ngenna an thawn a ni.

Zawhna chhangin School Education Minister chuan, high school atan mathematics leh science zirtirtu tur bik chu MPSC-in an lâk tawh thu a sawi a, "Tunah hian offer of appointment pek mek an ni a, an chhanna kan dawn kim hunah posting siam a ni ang," a ti.