KHAWTHLIR

MHIP inkhawmpui
Tuipuiral Block MHIP chuan Thawhlehni aṭang khan Khawbung community hall-ah inkhawmpui an hmang a, nimin khan bialtu MLA T Sangkunga'n a hmanpui. T Sangkunga chuan, zirna lama hmasawn turin chhungkaw nu ber an pawimawh tih sawiin, "MHIP member-te'n in fate nun hloh leh hloh loh chungchangah mawhphurhna sang tak in nei a ni," a ti. Tuipuiral Block MHIP-ah hian branch 21 awmin, vawiin hian volleyball leh hnam lâm hmangin an intihsiak dawn a ni.

UDID zirho
Social Welfare department buatsaihin nimin khan rualbanlote certificate pek chhuah dan thar, Unique Disability Identification (UDID) zirhona buatsaih a ni a, Social Welfare secretary P Lalchhuanga'n a hmanpui.Training pe tur hian sorkar laipuia Ministry of Social Justice and Empowerment aṭangin resource person an tel a; district tina Health department hnuaia chief medical officer, medical superintendent, computer khawihtute leh Social Welfare department hnuaia DPO, DSWO, CDPO-te leh computer khawihtute an tel a ni.

Pisa hawng
MUP General Headquarters chuan nimin khan kumin atan an pisa an hawng a, inhlanna leh infuihtharna hun an hmang nghal. MUP chuan kum 2018 chu hlim leh lawm taka mi dangte tana malsawmna nihna kum atana hmang ṭheuh turin mipuite duhsakna an hlân a ni.

Republic Day
Aizawl DC Dr. A Muthamma hoin Thawhlehni khan DC conference hall-ah Aizawla Republic Day hman dan tur official leh NGO hruaitute'n an ngaihtuah a, school contingent-a tel turte chu ei leh in mumal zawka pek an rel. Rua­hmanna siam a nih dan chuan Republic Day hi Lammualah zing dar 9 ah ṭan a ni ang a, Governor-in hnam puanzar a pawt pharh ang. Parade contingent hrang hrangte'n January 16 aṭangin lam an zir ṭan ang.