Rohluna leh Australia-a India palai inkâwm

Commerce & Industries minister H Rohluna chu nimin khan a pisaah Australia-a Indian consul general B Vanlalvawna nen an inkâwm a; Mizote thil deh chhuah zau zawka hralh dan tur an sawi dun.

H Rohluna chuan, Mizo puantah, hmei­chhe bih ang chi chu Mizoram chhungah pawh a hralh chhuahna kawngah a hnawng ṭêp tawh nia sawiin, hnam dangte'n an duh tur leh thawn chhuah tlak tur zawnga kal a hun tawh thu a sawi a; Mizo deh chhuahte ram danga hralh kawngah ṭan lak a hun hle tawha a hriat thu a hrilh.

New Delhi-a trade fare neih ṭhinah Mizoram stall a lûn thei hle tih sawiin Rohluna chuan, "Mizote hi kan mit a fing a, kan deh chhuah rawng hrang hranga chei mawi dan hnam dang pawhin an duh hle a, ṭanho dan awm thei se, handloom product hrang hrang zau zawka hralh chhuak turin Australian sorkar nen thawh dun dan awm thei se a duhawm hle a ni," a ti.

Sydney-a consul general B Vanlalvawna, IFS chuan, sumdawnna leh sum peipun lamah Mizoram tan kawng a awm thu sawiin, puantahna hmanrua lamah pawh inpuih theih dan kawng a awm thu a sawi a; Australia-in puantah lamah a mamawh ang tâwk an hmu thei lo a, Mizo deh chhuahte chu Australia-a hralh tura hmalak dan kawng a awm thu a sawi.

B Vanlalvawna chuan, Mizo thil deh chhuahte hralhna kawngah Sydney-ah a ṭul ang anga an lo buaipui theih tur thu Commerce & Industries Minister-in a hrilh bawk.

Inkawmnaah hian minister H Rohluna hi Commerce & Industries secretary Zothankhuma leh director Hmingthanmawia ten an ṭawiawm a; handloom lama Mizo deh chhuah ṭhate thlang chhuakin, Australia lama sumdawngte nen video conferencing-a inkawm zui ni se, thla hnih khat hnuah bawhzui nghal ni se, an ti a ni.