AR-in NGO Conclave an buatsaih

Assam Rifles chuan nimin khan Aizawla AR chhunga Loch House-ah NGO Conclave an buatsaih a; 46 AR commandant Col. Pratyush chuan, nasa lehzuala Mizo mipui tan AR-te'n hna thawh an tum thu leh tlawmngai pawlte nen inpawh lehzuala thawhho an duh thu a sawi.

Col. Pratyush chuan, kum 20 chuang kal tawha Aizawl dái, Zokhawsanga AR sipaite awmna tur ruahman ṭan a nihin inremnaah Mizoram sorkar tih ve tur eng emaw zat a awm tih sawiin, "Chu'ng zingah chuan kawlphetha pek te, kawng siam leh tui pekte a tel a, tun dinhmunah tihhlawhtlin loh a la awm nual avangin sipaite'n kan la luah thei lo. Aizawl khawpui lailia chêp taka inkhung khawm ai chuan, hmunhma zau leh nuam zawka khawsak chu kan duh zawk a ni," a ti.

46 AR Commandant chuan, AR sipai zingah ṭawng lama harsatna nei an tam thu sawiin, anniho zirtir paha páwn lam mite tana language class chhim ve theih tur buatsaih a nih tur thu a sawi a; AR-te'n sport association hrang hrang thawhpui zel an duh thu leh, sipaiah footballer 30 chuang, taekwondo leh karate player eng emaw zat lak an nih tawh thu a sawi bawk.

NGO Conclave-ah hian Central YMA, Mizoram Football Association leh Mizo Zirlai Pawl aiawhte telin, pawl aiawhte hian thu an sawi

CYMA president Vanlalruata chuan, sipaite leh Mizo mipui inthlunzawm hnaih lehzual a pawimawh thu sawiin, chuta tan chuan thawh dunna tur kawng a tam thute a sawi.

MFA treasurer Tuikhuahthanga chuan Assam Rifles leh MFA-te chu hun rei tak ṭhian ṭha tak an nih thu a sawi a, kawng tam taka an thawhonain rah ṭha a chhuah thu a sawi lang.

Assam Rifles hi kum 180-a upa a ni tawh a, khawvela paramilitary force upa ber niin, 46 Assam Rifles bik hi AR zingah chuan a naupang ber kum 12 chauha upa a ni thung.