Kuhva chiahna enkawl turin inremna ziak

Bilkhawthlir Kuhva Ching­tu Cooperative Society Ltd. pisa, Bilkhawthlirah nimin khan cheng nuai 35 senga NLUP Implementing Board (NIB)-in a siam, Mizorama kuhva chiahna (skop) hmasa ber, Chemphaia mi enkawl dan turah NIB leh Bilkhawthlir Kuhva Chingtu Cooperative Society ten inremna an ziak.

Inremna ziah inkhawm­ah hian NIB chairman JH Roṭhuama, MLA chuan, NLUP-in a tum ber chu kut hnathawktute'n an thawh rah an seng theih a nih thu sawiin, "Kuhva chíngtute'n hlâwk zawka an thawh rah an seng ngei theih beiseiin kuhva skop-na pawh hi siam a ni. A enkawlna dan an siam hi kan zavai tana

ṭha tur a ni tih hria a, ṭha taka zawm vek i tum ang u," a ti.

JH Roṭhuama hian Chem­phaia kuhva skop-na hawn a nih ṭuma a lo tiam tawh ang­in, a tihchangtlun belhna tur Rs. 19,98,200 chu Bilkhawthlir Kuhva Chingtu Cooperative Society hnenah a hlan nghal.

Inremnaah hian NIB aiawhin secretary James Lal­rin­chhana'n hming a ziak a, Bilkhawthlir Kuhva Chingtu Cooperative Society aiawhin an president Thangtama’n hming a ziak thung.

Inremna, NLUP Arecanut Processing Plant Agreement-ah hian kuhva skop-na hmun enkawltu tur committee pahnih din a ni a; Kolasib DC kaih­hruaina hnuaiah Managing Committee leh Bilkhawthlir BDO kaihhruaina hnuaiah Operational Committee din a ni.

Chemphai kuhva skop-na hi Bilkhawthlir Kuhva Chingtu Cooperative Society-te'n an enkawl a, tunah hian kuhva skop-na tuikhuah pindan pathum awmin, pindan pahnihah Indian variety kuhva rah nuai 13 an chiah mek a, pindan pakhatah Assam variety kuhva rah dah tuma inbuatsaih mek a ni.