Inkhârkhip chhungin Covid-19 vei a tam thei ang hmuh chhuah tum

State Nodal Officer on Covid-19 leh official spokesperson Dr Pachuau Lalmalsawma chuan nimin khan thuchhuah a siam a, inkhàrkhip chhungin Covid-19 vei a tam thei ang ber hmuh chhuah tuma ṭan lâk a nih thu a tarlang.

Dr Pachuau Lalmalsawma chuan, inkhàrkhip puan hma chawlhkar chhoah khan Aizawla local council 83 zinga 45-ah Covid-19 positive hmuh chhuah a nih thu tarlangin, "Positive hmuh chhuah zinga 80% chu natna lang chhuak (symptom nei) an ni a, positive hmuh tawh zawng zawng zinga 93% chu tualchhung mi, civilian an ni. Zirna-in leh kum upa lam positive an tam tâk êm avang leh damlo na tak tak an tam tâk avangin hri inkài darh zel tur rang taka vên a ngai a, sorkarin inkhàrkhip puan a hreh hle a ni," a ti.

Dinhmunin a zir si loh avangin zau taka inráwn ṭul tiin sorkar chuan kohhran, NGO, Indian Medical Association hruaitute leh department hrang hrang hotute ráwnin uluk taka sawiho a nih thu sawiin Dr Lalmalsawma chuan, "Nunna chhan hi a pawimawh hmasa ber a ni tih pawmin lockdown kan puang ta a ni. Hemi chhung hian Covid-19 hri kai a tam thei ang ber hmuh chhuah tuma ṭan lak a ni,"  a ti a; contact tracing leh sample lak hna chak taka thawh a nih thu a tarlang.

Covid-19 Spokesperson chuan, kawng hrang hrang - TV, radio leh social media kaltlangin mipui zirtirna leh dinhmun hrilhfiahna tih a nih thu sawiin, "Lockdown puan kár, kár kal ta chhung khan sample 9,781 test a ni a, AMC area-a local council 54-ah positive hmuh a ni. Positive hmuh zinga 77% mipa an ni a, hei hian mipate a chhuakvâk tam zawk kan nih avangin fimkhur a ṭulzia a tilang. Positive zinga tam tak hi dawr nghaktute leh anmahni aṭanga kái an nih avangin bazar kal leh dawra thil leinaah fimkhur a ṭul," a ti.

Dr Pachuau Lalmalsawma chuan, sorkarin inkhàrkhip a pawhsei chhungin theihtawpin hma a la tih sawiin, "Mi tin mahni inchîk a, symptom nei nia inhria emaw, mahni inringhlelte chu rang taka Mizoram Covid-19 helpline no. 102 (toll free), 0389 2323336, 0389 2318336-ah inhriattir ṭhin turin kan ngen. Positive contact nei nia inhriate pawh contact tracing team-in an biakpawh nghak kher loa mahni inhriattir vat turin kan ngen a ni," a ti. Hripui darh avangin chî-âi mai lo a, rilru fím tak nen fimkhur taka invéng turin mipui a chah a ni.