KHAWTHLIR
Biak-in hawng
Hnahthiala Baptist Church of Mizoram (BCM) Peniel Kohhran biak-in thar chu nimin khan BCM general secretary Rev. F Rodinmawia'n Pathian hnenah hlanin a hawng. Biak-in hi June 20, 2011-ah sak ṭan niin, a dung ft. 109 leh a vâng ft. 45-a zaua sak a ni a; a sak nan Rs. 1,30,62,471 bakah, tha 6,950 an seng a ni.
Minister damlo
Home minister R Lalzirliana chu rannung seh natna (scrub typhus) vangin tun hnai khan Aizawl Civil Hospital-ah dah luh a ni a, January 10, Nilaini khan Synod Hospital, Durtlangah sawn a ni. Home Minister hi ngaihtuahawm a ni loa thu dawn a ni.
Mi 1,067 admit
December 2017 chhung khan Aizawl Civil Hospital-ah mi 44,946 an inentir a, mi 1,067 admit an ni. Mitthi 70 an awm laiin, nau piang 360 an awm. December thla chhung vek khan mi 128 chu phai lama enkawl tura thawn (refer) an ni.
Lungphùm phúm
Synod moderator Rev. F Lalrinnunga chuan January 10, Nilaini khan Synod Hospital complex-ah Nursing College building tur lungphùm a phúm. College building hi a dung ft. 150 leh a vâng ft. 45 a zau, chhawng li-a sak tur a ni. Synod Inkhawmpui 2017 chuan Synod Hospital-a Nursing School chu Nursing College-a hlan kai a rel a ni.
Lungphunlian Day
Lungphunlian khaw-tlang chuan January 8-9, 2018 chhung khan an khaw community hall-ah Lungphunlian Day an hmang a, bialtu MLA TT Zothansanga'n a hmanpui. Lungphunlian hi Champhai district-a awm a ni a; Mizoram buai laia an khaw ṭhenawm Hnahlana khawm an nih hnuah kum 1972-ah an khua hi an luah leh ṭan a ni.
Oil palm
Mizoram Oil Palm Advisory Committee chu Nilaini khan Agriculture dept. committee room-ah an ṭhukhawm a, meeting-ah hian Mizoramah oil palm ram hectare 25.027-a zauah chin a ni tawh thu tarlan a ni.