Mizoram leh Assam sorkarin ramri buai hi Politics khelh nan an hmang em ni? - MPCC

Mizoram Pradesh Congress Committee (MPCC) chuan thuchhuah siamin, ramri buai chungchangah Assam-a sorkarna chelh mektu BJP chu NEDA lama MNF thurualpui an nih avangin, ramria buaina chu Assam leh Mizoram sorkarin politics khelh tawnna atan an hmang em ni, tih chu Mizoram mipui ngaihdan a nih thu an tarlang.

MPCC chuan, Assam-in ramri an khâr avanga Mizoramin kawng hrang hrangin harsatna a tawh thu tarlangin, "Home minister Pu Lalchamliana, minister atana lak luh a nih nía a inchei dan avanga amaha mipuiin beiseina sang tak kan neih kha a thlâwn chiang hle a ni," an ti.

Mipui thlàwpna sorkarin a hmu ṭha em em chungin sorkar zawk chu a tàwp thlenga che turin inpuahchahna mumal nei loah puhin MPCC chuan, "Mipui hmuh tura silai lek a, sniper rifle thlenga pho chhuaka inlâk huaisen kha lemchanna (drama) mai mai a lo ni tih a chiang chho zel," an ti a; ramria buaina chu Assam leh Mizoram sorkarin politics khelh nan an hmang niin mi tam takin an ngaih thu an sawi.

Congress pary chuan, ramria buaina chungchangah eptu party-te'n sorkar hmalakna thlàwp an inpeih reng laiin, sorkar zawkin eptu party-te thlàwpna a hnâwl nia sawiin, "Tunlai ramri buai chungchangah hian all party meeting pawh an la ko duh lo. Hei hian ramri buai chinfel kawnga MNF sorkar thutak (serious) lohzia a tarlang chiang hle," an ti.

MPCC chuan, Silchar Mizoram House-a Mizo driver tangkhang mek leh Manipur lama tlânchhe mekte chhanchhuahna tur leh chhawmdawlna kawngah Mizoram sorkarin hmalakna mumal a nei lo nia sawiin "Rálṭi taka awm mek Mizo tam takte thlamuan turin Home Minister-in ṭawngkam a chhâk chhuak lo," an ti. Mizoram sorkarin Mizo driver tangkhangte lak chhuah a tum lo zel a nih chuan, la chhuak turin Congress party-in theihtawp an chhuah dawn thu an sawi bawk.