RAT a rintlak em? Covid-19 vei mi 11-te RAT-ah a lang lo Red zone-te RTPCR-a endik vek tum
June 1, Thawhṭanni zana Covid-19 hri vei hmuh chhuah mi 12 zinga Kolasib district lam mi 11-te chu a tira endikna rapid antibody test (RAT)-ah an dinhmun a ṭha (non-reactive) vek nia thu dawn a ni; nimahsela a endikna khawl ṭha zawk Reverse Transcriptase Polymerase Chain Reaction (RTPCR) hmanga endik an nih hnuah Covid-19 an vei tih hmuh chhuah a ni. Health department chuan, hri hluarna hmun (red zone) aṭanga tangkhang rawn hawte chu RTPCR hmanga endik vek an tum.
Mizorama Covid-19 kai an hmuh chhuah chungchanga Health Minister-in June 2, Thawhlehnia thuthar thehdarhtute a kawmnaah sorkar official lam chuan, Covid-19 vei hmuh thar mi 12-te chu RAT-ah an lang chhuak sa (reactive) niin an sawi. Hetih lai hian, Vanglaini thu dawn danin, Kolasib district-a Thingdawl Polytechnic quarantine centre-a Covid-19 vei mi 11-te chu RAT-ah a lang chhuak lo (non-reactive) veka sawi a ni thung..
Kolasib district mi leh sa, India ram chhung red zone aṭanga rawn hawte chu RAT-ah lang chhuak lo mah se fimkhur thilah an swab sample lak vek a ni a, chu'ngte chu RTPCR hmanga endik a nih hnuah mi 11-te hian Covid-19 an kai tih hmuh chhuah a ni.
Red zone aṭanga rawn haw district danga mite pawh an swab sample lâk a ni a, Kolasib district-a mite chu endik hmasak zingah an tel niin Health department hotute chuan Vanglaini palai an hrilh.
Health department chuan, red zone aṭanga rawn hawte chu RAT-ah hri vei angin lang kher lo mah se, RTPCR hmanga endik vek tura hriattirna nimin khan a tichhuak.
Vanglaini palai zawhna chhangin Health secretary H Lalengmawia chuan, kháwl leh sample test-na hmanrua awmte dinhmun thlirin red zone aṭanga rawn hawte chu Covid-19 hri vei leh vei lo endikna khawl RTPCR hmanga endik vek theih an inhuam thu a sawi.
Health Secretary chuan, tuna an hmanraw neihte'n red zone-a mite endikna daih lo pawh ni se, RTPCR hmanga endik vek turin hmanrua a thlen belh zel dawn tih sawiin "Hmanraw chahte a rawn thleng zel ang a, harsatna awm loin kan test theih kan ring. RTPCR khawl pawh kan neih belh zel dawn a, tun kar chhung hian pakhat chu Manipur aṭanga phurh luh tum a ni," a ti.
Health department hotute sawi danin, RTPCR khawl neih belh a nih pawhin, tuna ZMC-a RTPCR dahna hmunah tho dah theih a la ni. ZMC-a khawl awm mekin ṭum khatah sample 180 a endik thei a, mahse, chutiang zat chu ṭum khatah endik a ni ngai lo.
Covid-19 kai hmuh chhuahte'n an kai chhàwn theih àwma langte chu chhui zui nghal a nih thu sawiin Health department-a thawkte chuan, "Health department leh police lamin Contact Tracing Team an din a, a chhui hna an thawk nghal. Rél leh lirtheia an chuanpuite bakah, quarantine centre-a an awmpuite chhui chhuah deuh vek a ni tawh a, an sample endik vek a ni ang," an ti.
IMA hruaitute hnen aṭanga Vanglaini thudawn danin, doctor-te chuan RAT-a endik chu rintlak tluantling lo, innghah ngamna tling loah an ngai a; state pawn aṭanga hawte hi a tam thei ang ber khawl ṭha zawk RTPCR hmanga endik an duh a; Mizoram sorkar chu a a theih anga tam RTPCR lei thei se an duh thu Vanglaini an hrilh.