Myanmar raltlânte tan Central-ah Ṭanpuina kan dil sak - CM Hawla

Chief minister Lal Thanhawla chuan, Myan­mar aṭanga Mizorama raltlante tan sorkar laipui­ah ṭanpuina an dilsak thu a sawi a, "An awmna hmun ngaia an awm leh theihna atan theihtawp chhuah mek a ni," a ti.

Chief Minister hian nimin khan Congress Bhavan-ah thu sawiin, Myanmar sipai leh Arakan Army inkah vangin Myan­mar aṭangin mi 1,500 chuang Mizoramah an ráltlàn thu a sawi a, "Inbeihna vang hian Zo hnahthlak tam tak chu Mizoramah an rawn ráltlân a, Lawngtlai district-a khaw paliah enkawl an ni," tiin, raltlante vangin Mizoram sorkarin harsatna a tawh mek thu a sawi.

Raltlan an tam tham avangin an chenna tur in a awm lo tih sawiin Lal Thanhawla chuan, "Sikulahte dah an ni a, an ei leh in turte ngaihtuah a ngai a, communication ṭhat loh vangin a buaithlak hle. Sorkar laipuiah ṭanpuina kan dilsak mek," a ti.

Chief Minister chuan, raltlante enkawl kawngah Assam Rifle-te an ṭangkai hle a, anni nen ṭangkawpin raltlante enkawl kawngah theihtawp kan chhuah a ni," a ti a; an awmna hmuna an kîr leh theihna atan Assam Rifle-te nen theihtawp an chhuah mek thu a sawi.

Myanmar sorkar nena inlaichin­na ṭha awm theih dan an ngaihtuah thu sawiin CM Hawla chuan, "Sorkar laipuiah pawh kan duh dante kan thlen ve zel a. Zo hnahthlak MP kan nei tih an hriat avangin sorkar laipui hian keimahni kaltlanga inlaichinna ṭha neih an duh a ni," a ti.

Myanmar ram buai vanga ral­tlante lo dawngsawngtu khuate chu bialtu MLA C Ngunlianchunga chuan a MLA fund aṭangin Rs. 2,00,000 a pe a, VCP-te kokhawmin hma la nghal turin a hriattir. Ral­tlante chu an luhna khuate'n kawng hrang hrangin an lo buaipui zel a, an buh tharte pawh raltlante tan an pe nual hlawm a ni.

An luhna khuaa VCP ṭheuhte'n an tarlan dan chuan, raltlante hi Hmawngbuchhuah khuaah 284, Zochachhuahah 397, Laitlangah 443 leh Dumzautlangah 235 an awm a; an vaiin mi 1,359 an ni.