MYC Chairman leh Consul General-in Mizo ṭhalaite hamṭhatna tur sawi dun

Mizoram Youth Commission (MYC) chairman Joseph Lalhimpuia, MLA chuan nimin khan Indian High Commission, Australia-a consul general B Vanlalvawna chu a chenna inah a kâwm a; Mizo ṭhalaite Ministry of External Affairs kaltlanga hamṭhatna an neih theih dan tur a sawipui.

MYC Chairman chuan, kum tin Mizo ṭhalai lehkha thiam tam tak an chhuah ṭhin thu leh an zavai tan sorkar hnain a daih loh thu sawiin, "India ram hmun hrang hrang leh khawvel ram danga hna an thawh theih dan kawng zawn a ngai a ni," a ti.

B Vanlalvawna chuan, ṭhalai anmahni ram páwna awmte an state tana an ṭangkai dan leh ram danga awmte'n an chhungte hnena hlawh an thawnte chu state tan hamṭhatna a tlin thu a sawi a; "Australia-ah pawh nurse mamawhna a sang hle a, hlawh pawh a ṭha a ni," tiin, a ṭul anga hmalak a inhuam thu a sawi.

Joseph Lalhimpuia hian Mizo nurse-te Australia-a hna an thawh chu ṭha a tih thu sawiin hmalak nghal a inhuam thu a sawi a; Australia-a kal duhte tan IELTS leh Bridging Course an paltlang theih dan tur ngaihtuahpui turin B Vanlalvawna a ngen a ni.

Inkawmnaah hian MYC Chairman hi LESDE department director Lalhmunsanga leh MYC officer ten an tawiawm a ni.