IPR hotute'n Covid-19 do dan sawiho

IPR department hotute chuan an minister Lalruatkima hoin nimin khan Covid-19 darh zel vên kawnga an department hmalakna an thlirho. Minister chuan, hripui darh dante a danglam chho nia a lan thu leh Mizorama thil thleng chungchangte a sawi.

Lalruatkima chuan, Covid-19 darh dan a danglam chhoa a lan thu sawiin, "Mipui zirtir kawngah boruak inher chho zel mila kalpui a ṭha a, tha thlah loa mar pátin publicity leh awareness kan kalpui a ṭul zel dawn a ni," a ti.

Mizoram-Assam ramria buaina awm kaihhnawihah Minister chuan, Zoram mipuiin inlungruala sorkar hmalakna an ngaihchân thiam a pawimawh thu te, Manipur aṭanga oil leh gas phur tura tanker panga leh truck pathum thang mekte chu vawiinah Aizawl an thlen beisei a nih thu te, Silchar leh a chhehvela awm Mizo tangkhangte hruai haw dan tur Mizoram sorkarin a ruahman mek thute a sawi.

Ṭhutkhawmah hian IPR secretary Sangdingliana, joint secretary Betsy Zothanpari Sailo, director Lallianpuii leh officer dangte an tel a ni.