KHAWTHLIR

Thisen pe
Saikhamakawn Branch KṬP chuan an branch din champha vawi 43-na pualin nimin khan Synod Hospital tan thisen unit 26 an pe a, a petute mipa 25 leh hmeichhia pakhat an ni. Serchhip P&E Veng Branch YMA pawhin kar leha an branch silver jubilee pualin nimin khan JN Hospital-ah thisen unit 60 an pe a, a petute mipa 41 leh hmeichhia 19 an ni.

Khehpuam man
Excise & Narcotics department-a Anti-Narcotics Squad chuan January 11, Ningani zan dar 8:20 khan Maubawk rama Nghaltan zauah khehpuam (Pseudoephedrine) mûm 11,07,000 (kg. 123) an man a; a neitua puh mi pathum - Pausuanthang (44) s/o Chinsialthang, Chikha, Myanmar, Thansiama (46) s/o Nginkhawzam, Tiddim, Myanmar leh, Lalhmachhuana (45) s/o Doa, Kawlbem, Champhai district nia inchhálte an man nghal.

NLUP sem
AH Vety department chuan nimin khan Lawngtlaiah NLUP hnuaia vawk vulh thlangtu chhungkaw 119 hnenah vawk chaw an sem. Vawk chaw hi chhungkaw pakhatin quintal ruk ṭheuh an dawng a, a la dawng ve lo chhungkaw 504 hnenah pawh hun remchang hmasa berah la sem leh tur a ni.

PZP khawmpui
Pang Zirlai Pawl (PZP) chuan Ningani khan Bungtlang South-ah inkhawmpui an hmang a, minister of state KS Thanga'n a hmanpui. KS Thanga chuan, Mizorama hnam hrang hrangte inchhûn khawmna chu Mizo a nih thu sawiin, "Khawi hmunah pawh awm ila, Mizo kan nihna hi kan chhuang fo tur a ni," a ti. PZP hian Chamdurtlangah headquarters an nei a, an hnuaiah hian sub-headquarters pali leh unit 12 an awm a ni.

MLA-in enfiah
PMGSY hnuaia Zuangtui leh Muthi inkar kawng siam mek chu nimin khan bialtu MLA R Lalrinawma'n a enfiah a, PHE, PWD, Muthi Village Council leh NGO hruaitute'n an ṭawiawm. Zuangtui-Muthi kawng siam mek hi km. 2.260-a thui niin, side drain 1370 RM a awm dawn a, Rs. 1,67,95,838.09 senga siam tura ruahman a ni.