Sports Minister-in stadium siam mek a enfiah

Sports & Youth Services minister Zodintluanga chuan nimin khan Kolasib Venglaia Sports Stadium siam mek a tlawh a, hna thawh dan a enfiah.

Zodintluanga chuan, hma­sawnna tura ram kalsiam zelah rahbi pawimawh tak, stadium sakna tur Kolasib Venglai YMA-in phal taka ram an pe chu a lawmawm a tih thu a sawi a, "Khawtlang mipui pawhin lawm nacháng hriaa sorkar hmalakna hrang hrangte ṭawiawm zel turin ka sáwm a. Sports infrastructure-ah

ṭhalaite'n rual an awh lohna turin sorkarin chak takin hma a la mek a ni," a ti.

Sports Minister chuan, sta­dium sak hna thawktu engineer-te kâwmin, stadium chu hun bituk chhunga sak zawh hman ngei tum turin a chah a, harsat­na an neih leh neih loh zawtin, state sorkarin an tih theih chinah engtik lai pawha puih an inhuam reng thu a sawi.

Sports Stadium sak mek hi Ministry of Urban Development sum sênga sak a ni a, a enkawltu tur nodal agency chu UDPA department niin, a satu chu National Buildings Construction Corporation (NBCC) a ni. Sorkar laipui aṭanga sum hmuh dan azirin March 31, 2018-a siam zawh hman tura beisei a ni.

Stadium zauh zawng chu a dung metre 100 leh a vâng metre 65 a ni a, football khelmualah phullem phah a ni dawn a, synthetic running track lane pariat siam a ni ang.