Covid-19 vei pakhat hmuh belh Niminah mi 250 endik leh a ni
Zoram Medical College (ZMC) Covid-19 Laboratory-ah June 2, Thawhlehni zan khan Covid-19 hripui vei pakhat hmuh chhuah belh a ni a, heti hian Mizoramah hripui vei mek mi 13 an awm. Nimin khan ZMC laboratory-ah hian mi 250-te swab sample endik leh a ni.
Sorkar thuchhuah tarlan danin, Thawhlehni zana Covid-19 vei hmuh chhuah thar hi mipa kum 30 mi, Aizawla cheng a ni a, Delhi aṭanga May 31-a lo haw niin, a khua a sik avangin quarantine centre aṭangin State Referral Hospital (SRH), Falkawnah dah luh tawh sa a ni. Covid-19 hri a vei tih hmuh a nih hian Risk Ward aṭangin Isolation Ward-ah an sawn nghal.
Tun dinhmunah ZMC Laboratory-a Covid-19 kai hmuh chhuah leh vei mek chu 13 an tling ta a, hmeichhia 11 leh mipa pahnih niin, Delhi aṭanga rawn haw mi 11 leh Kolkata aṭanga rawn haw pahnih an ni; Isolation Ward-ah vek dah an ni. SRH-ZMC bulletin chuan, hripui vei mekte'n an taksaah harsatna lian an nei lo a, ngaihtuahawm an ni lo tih a tarlang.
June 2, Thawhlehnia ZMC laboratory-a endik mi 83 zinga pakhatin hripui a kai laiin, mi dang 82-te chuan hripui an kai lo tih hmuh a ni a; nimin khan (tlai dar 5 thlengin) mi 250-te swab sample endik leh niin, result kan hre hman lo.
SRH-ah nimin khan Covid-19 vei rinhlelh thilah mi pariat dah luh thar a ni a, an zinga parukte Thawhlehnia admit tawh mi pakhat chu nimin khan swab sample endik ni mah se, he thu ziah lai hian result a la chhuak lo. Nimina admit zinga pahnihte swab sample erawh chu vawiinah endik a ni ang.
SRH-ah hian nimin tlai dar 5 thleng khan Covid-19 vei ni lo, rinhlelh thila dah luh mi 13 an awm a, Risk Ward-ah mi pariat leh Holding Ward-ah mi panga an awm.
June 2 tlai dar 5 leh nimin tlai dar 5 inkarah Mizoram luhka hrang hranga screening point-ah mi 944 enfiah an ni a, rapid antibody test (RAT) hmanga endik mi 279 an awm bawk.