Bungraw phurh phalna dil theih
Aizawl DC R Lalramnghaka chuan nimin khan thupek chhuahin, Aizawl khawpuia inkhârkhip chhunga AMC area-a bungraw phurh luh theih dan a tarlang.
AMC area páwna bungruate chu Aizawl DC hnena phalna lain, hlân thlak theih a ni a, Aizawl khawpui aṭanga khawpui páwn lama bungraw phurh chhuah pawh phalna neite tan remtih a ni.
Bungraw phurh phalna dil dan
▷ Bungraw neituin phone (Whatsapp) number 9612317380 leh 9862680482-ah an dil thei.
▷ Dilnaah diltu hming, address leh phone (Whatsapp) number, motor registration number, driver leh a chuang ve mi dangte hming leh mPass ID number tarlan tur a ni. Aizawla bungraw hlân thlak tur nei chuan bungraw hlân thlakna tur hmun leh address sawi lan tur a ni.
▷ Bungraw hlân thlâkna hmunah bungraw phurtu motor chu kawng lakah din khawmuan phal a ni lo. Bungraw hlân thlâk laiin ṭul tàwpah lo chuan motor-a chuangte chhuk a, mi dang hnaiha awm loh tur a ni. Bungraw hlân thlak zawh veleh chhuah leh nghal tur.
▷ Contact tracing leh thil dang vanga inkhârkhip mek veng chhunga mite chu bungraw hláng thla turin véng páwna hruai chhuah loh tur a ni.
▷ Bungraw khawihtute inhnaih loa awmin, hmai an tuam vek tur a ni a, hna thawh zawhah kut sil zel tur. Hemi chungchangah hian bungraw neituin mawh a phur.
▷ AMC area paltlang phalna pekte chu Aizawlah ding khawmuang loin an kal tlang zel tur a ni.