Inkhawmpui hun sawn a ni

Mizoram Synod chuan kumina pastor bialte inkhawmpui hun atan July 24-25, 2020 an ruat a; UPC (North East India) Executive Board pawhin India hmarchhak huap UPC General Conference chu November 26-29, 2020 chhunga neih turin an sawn bawk.

Mizoram Synod-in nimina hriattirna (office circular) a chhuah danin, kumina bial inkhawmpui neih tur chu kum danga kalpui dan anga kalpui loin, vantlang Pathian biak inkhawm nei lo a, rorel inkhawm chauh neih tur a ni a; rorelnaah pawh palai ni sate bakah kohhran tin aiawh mi pahnih chauh tel tur a ni. Inkhawmpui thlengtu kohhran awmna khua/veng task force-te thu ngaichang turin an chah bawk. Bial inkhawmpui hi kum dangah chuan April thlaah neih a ni ṭhin.

UPC-NEI General Conference hi kum tin April thla Pathianni vawi hnih/thumnaah neih ṭhin a ni a, kuminah chuan hripui lêng vangin July thla Pathianni hnuhnung bera neih tura ruahman a lo ni tawh a; mahse, ram dinhmun thlirin, November thla Pathianni hnuhnung ber hmanga neih turin an sawn leh ta a ni.

UPC (NEI) Executive Board chuan, Covid-19 hripui lêngin eng chen nge Mizoram a nghawng dawn hriat a nih loh avangin sum renchem thiam tur leh, loh theih loh thilah lo chuan sum hmang lo turin tualchhung kohhran an ngen a ni.