Quarantine aṭanga chhuak rûte hrem Siaha district-ah total lockdown mek

Delhi aṭanga tun hnaia rawn haw, Siahaa quarantine centre-a awm mek mi pahnih chu June 2, Thawhlehni khan khung hranna aṭangin an chhuak ru a, hrem an ni. Siaha district-ah hian nimin aṭang khan total lockdown puan a ni a, vawiin leh naktukah chhunzawm a ni ang.

Siaha aṭanga thu dawn danin, qua­rantine centre aṭanga chhuak rute hian dawr pakhatah phone an siamtir a, hei vang hian phone siamtute chhungkua hi mahni ina inkhung (home quarantine) nghal tura hriattir an ni. Auto-rickshaw an hman erawh chu an la hre mai thei lo niin an sawi.

Quarantine centre-a awm lai, an awm hun a zawh hmaa chhuak rute chu The Mizoram (Containment and Prevention of Covid-19) Ordinance, 2020 bung 4(7) angin Rs. 1,000 aia tlem lo, Rs. 5,000 thleng chawitir theih a ni a; Siaha mi chhuak ru mi pahnihte hi Rs. 1,000 ve ve chawitir an ni.

Siaha district-ah hian District Ma­gistrate thupek angin nimin khan ni thum chhung total lockdown an kalpui tur chu ṭan a ni a, dawr inhawng a awm lo a, total lockdown-in a huam loh duty pawimawh bikte lirthei tih loh chu khawlaiah lirthei tlan a awm lo. Total lockdown hi ni thum chhung kalpui phawt tur a nih angin, vawiin leh naktukah an chhunzawm leh ang.

Total lockdown chhung hian May thlaa phai aṭanga rawn haw, quarantine centre-a awm hun tàwp tawh mi 132-te chu an awmna leh an dinhmun chhui zui a ni dawn. Quarantine centre aṭanga an chhuah dawna rapid antibody test (RAT) hmanga endiknaah ṭha vek (non-reactive) mah se, an hriselna dinhmun enfiah nawn a ni dawn a, an dinhmun azirin Reverse Transcriptase Polymerase Chain Reaction (RTPCR) hmanga endik tura ruahman a ni.