Ramri-ah boruak thar a awm rih lo : Ramri venghim tura inpe an tam

Vairengte lama Mizoram leh Assam ramri-ah boruak duhawm lo a awm thar rih lo a, state pahnih police-te an la inkulh ve ve. Hetih lai hian, ramri venghim tura inpe mi eng emaw zat an awm tawh.

Vairengte Joint VC kaihhruaina hnuaia July 4, 2021-a Vairengtea tlawmngai pawl hrang hrang president-te ṭhukhawm chuan Vairengte leh a chhehvel ramri venghim turin Border Defence Force (BDF) din an rel a; BDF-a tel duh tlangval leh pavalai hman tlak tur tan inpek theih a ni.

Vanglaini palai zawhna chhangin Vairengte Joint VC chairman Lalfamkima chuan, BDF atana inpe mi eng emaw zat an awm tawh thu a sawi a, "Rawn inpe an la awm belh zel a ni," a ti.

Lalfamkima chuan, Vairengte khaw páwn lam aṭang pawhin BDF-a inpe duh mi eng emaw zat an awm thu sawiin, "Khaw dang aṭanga inpe duhte hi chu kan la ziak lut chiah lo," a ti a; khaw dang aṭanga inpe duhte chungchang chu an la ngaihtuah zel dawn tih a sawi.

Hetih lai hian, tun hnaia ramria buaina chhuahna hmun Vairengte ram Aitlangah boruak duhawm lo thleng thar a awm rih lo nia thu dawn a ni.

Tarlan tawh ṭhin angin, Assam police-te chu June 29, 2021 khan Hailakandi SP hoin Vairengte tui lâkna, Vairengte aṭanga km. 4 vela hlá Aitlang hnár lamah inkulh tumin an kal a, hun eng emaw chen Mizoram police-te leh Vairengte mite'n an dan hnuah an paltlang.

June 30 khan Kolasib DC Dr H Lalthlangliana leh Hailakandi DC chu Ailtlangah an inbia a, ruahmanna an siam dan chuan, July 9, 2021-ah state pahnih chief secretary-te an inbiak hma chu state pahnihte'n Aitlang ramah hmalakna neih loh tur a ni.

Assam police-te chuan July 1 khan June 30-a Vairengte ṭhalaite leh Mizoram police-te'n June 30, 2021 zana Aitlang rama puan-in an kaih chu an tichhia a, an bungruate pawh lâk chhuah an phal lo. Mizoram lamin puan-in an kaihna leh a chhehvelah an inkulh chhunzawm nghal bawk.

He thu ziah lai thleng hian Mizoram police-te chu Assam lamin an awm an phalsakna chinah an la awm a, an awm mekna hmun thlen hma deuha an camp awm ṭhin erawh chu Assam lamin an phal chin pêl chuang loin a chhak deuhah an insawn a ni.

Tun hnaiah Lailapur lamah pawh Assam police-te hi an rawn inchhawp hnai a, central force ho inkulhna hmunah an awm ve. Heivang hian Lailapur lamah hian Mizoram police-te pawh inralring rengin an awm.