MP-in rél kawng siam mek a tlawh

Rajya Sabha MP K Vanlalvena chuan nimin khan Bairabi - Sairang rél kawng siam mek tlawhin, hna thawh dan a enfiah a; rél kawng chu siam zawh hun tura ruat December 2023 chhung ngeia ṭha taka zo hman turin Railways hotute leh thawktute a chah.

K Vanlalvena hian Bairabi-Sairang rél kawng siam mekah hian Khàmráng kawnga bridge (lei) no. 115 siam mek te, Khàmránga rél chawlhmun tur te, bridge no. 161 leh 167 te, Kurung lui chunga lei dawh bridge no. 196 te, Sairanga rél chawlhmun tur leh lei verh (tunnel) pali a tlawh a ni.

MNF thuchhuah tarlan danin, Bairabi-Sairang rél kawng hi km. 51.38-a thui tur niin, a siam nan cheng vbc. 6,000 ruahman a ni a, cheng vbc 3,900 vel hman tawh niin, cheng vbc. 2,100 vel la hman loh a awm. Hna thawh tur zinga 58% vel zawh a ni tawh. He rél kawng atan hian kum 2021-22 sorkar laipui budget-ah cheng vbc. 1,000 dah belh a ni bawk.

MP K Vanlalvena hi deputy chief engineer Har­jimalanee, project manager Bragen Das leh Railways executive engineer-te'n an lo dawng­sawng a ni.