Naupaite vaccine pek tum hnai
Nimin khan Health minister Dr R Lalthangliana hoin Secretariat conference hall-ah sorkar official-te leh pawl aiawhte an ṭhukhawm a; Ministry of Health & Family Welfare-in third wave thleng thei chungchanga naupangte enkawlna tur inkaihhruaina tun hnaia a siam, 'Guidelines on Operationalisation of Covid Care Services for Children & Adolescents' an thlirho.
Meeting-ah hian kar leh aṭangin naupaite vaccine pek tum a nih thu tarlan a ni. Meeting-a tarlan a nih danin naupaite vaccine pek chungchangah sorkar laipui a fimkhur hle a, an duh danin vaccine petute tunkar chhung hian training uluk taka pek niin, karleh aṭang chuan pekchhuah ṭan theih tum a ni. Naupaite hi vaccine pek an nih hmain uluk taka counselling neih pui tur a ni a, anmahni duhthlanna ngeiin pek chauh tur an ni.
Health Minister chuan, Mizoramah Covid-19 vei an la tlakhniam theih loh rualin, an ngaih pawimawh ber tur pakhat chu hri veite nunna chhan a nih thu a sawi a, "Mithiamte'n hripui thawh thumna lo thleng leh ngei tura an sawi avangin kan tlin tâwk chinah a ṭha thei ang bera kan inbuatsaih a ngai. Inbuatsaihna pawh tluang takin a kal mek a ni," a ti.
Guidelines on Operationalisation of Covid Care Services for Children & Adolescents-ah hian damdawi-ina naupangte enkawlna tur khum siam belh dan tur te, naupang damlo enkawlna hmanrua leh damdawi ruahman dan tur te, naupang damlo awmpuitute chungchang leh khawtlanga inkaihhruaina leh inzirtirna kalpui dante tarlan a ni.
Covid-19 leng thawh khatna (April 2020 - February 2021) chhungin India ramah naupang kum 10 hnuai lam hripui vei mi 3,68,117 an awm a, thawh hnihna (March - June 21, 2021) chhungin naupang kum 10 hnuai lam hripui vei 5,68,767 an awm.
Sorkar laipuia mithiamte sawi danin, thawh khatna leh thawh hnihnaah hripui vei naupang zinga 2-3% chu damdawi-ina enkawl ngai an ni. An chhût dan chuan, thawh thumnaah naupang hripui kai zinga 5% vel damdawi-ina enkawl an ngai dawn.
Thawh thumna thleng thei chungchangah mipui hnena inzirtirna ṭha taka pek a ṭul thu meeting-ah hian tarlan a ni a; chuta tan chuan ASHA leh health worker-te training pek tawh an nih thu leh paediatrician-te chu CCC-ah teleconsultation hmanga ràwn theih tura ruahmanna siam tur niin, DCHC-ah chuan on-call duty an nih a ngai dawn thu tarlan a ni bawk.