Mizo HSS result fel loh chhanah principal puh : Education Director-in thawktu pek belh a rawt
Higher Secondary School Leaving Certificate (HSSLC) Examinations 2021-a Mizo Higher Secondary School zirlai 25-te internal mark MBSE-a thehluh loh chungchang chhui chiangtu School Education Director chuan Mizo HSS Principal chu mawhphurtu berah a ngai a, thawktu pek belh a rawt nghal.
June 18, 2021-ah MBSE chuan HSSLC 2021 result a tichhuak a, tlai lamah Mizo HSS zirlai 25-te result-ah felhlel a awm avangin complaint a lut nghal a ni.
Complaint a luh tûk, June 19-ah MBSE-a exam buaipuitute an ṭhukhawm nghal a, zirlai 25-te result chu an tihfel nghal. MBSE chuan June 24 khan sorkarah report an thehlut a, School Education minister Lalchhandama hoin official-te'n hmalak dan tur an ngaihtuah nghal.
School Education Minister hoa ṭhukhawm chuan, thil thleng chhui chiang turin School Education Director an ruat a, darkar 72 chhunga report thehlut turin an hriattir. Chhui chiangtu hian hun tiam chhungin, June 27 tlaiah report a thehlut a ni.
Vanglaini palai zawhna chhángin minister Lalchhandama Ralte chuan, report luh aṭanga pisa kài ni hmasa berah report an thlirho nghal thu a sawi a, "Report-a a lan dan chuan, mawhphurtu ber chu Principal a nih avangin proceeding draw ni se tih a ni. Tunah hian Principal hi thiam loa puh a nihnaah sawi duh a neihte ni 15 chhunga sawifiah tura tih a ni," a ti.
School Education Minister sawi danin, Mizo HSS Principal hian thiam loa puh a nihna a pawm a nih chuan a ṭul anga hmalak a ni dawn a; a pawm lo a nih erawh chuan dan anga chhui zui turin third party investigating officer ruat a ni ang.
Thil thleng chhuitu School Education Director chuan a report-ah, Mizo HSS chu a len tham avangin thawktu, a bik takin administration lama indaih lohna a awm thu a tarlang a, mihring inpawh chawp leh thil dangte a awm ṭhin tih tarlangin, thawktu pek belh a rawt. Chumi bawhzui chuan Mizo HSS-ah hian School Education Directorate aṭangin UDC pakhat dah nghal a ni.
Tarlan tawh angin, Mizo HSS zirlaite result-ah fel lo a awm avangin principal mawhphurhna la mektu chu chawlhtir lailâwk rih a ni a, a aiawh atan School Education joint director Lalthanzama ruat niin, June 23 khan mawhphurhna a la ṭan a ni.