Laldenga thlânah hriatrengna pangpar dah

Nimin zing khan MNF dintu Laldenga thih champha pualin a thlanah a nupui Lalbiakdiki leh MNF hruaitute'n pangpar an dah.

Nimin July 7 kha MNF dintu Laldenga thih champha vawi 31-na a ni a, Treasury Square-a a thlanah nimin zing khan a nupui Lalbiakdiki, MNF president Zoramthanga leh MNF hruaitu dangte'n hriatrengna, zahna leh chibai bûkna pangpar an dah.

Mi tam takin Mizo Hnam Pa anga an ngaih Laldenga thlanah hian nimin zing dar 7 khan hun hman a ni a; amah hriatrengna leh zahna lantir nan pangpar an dah a, programme dang hman a ni lo. MNF president Zoramthanga, chief minister-in pangpar a dah hmasa ber a; chumi dawta Laldenga nupui Lalbiakdiki leh MNF hruaitu dangte'n an dah ve leh a ni.

Laldenga hi July 11, 1927-ah Pukpui, Lungleiah a piang a, kum 1959-ah Mizo National Famine Front a din. MNFF chu October 22, 1961-ah Mizo National Front tia thlak a ni a; MNF-ah hian a thih thlengin president a ni.

Kum 1986-a inremna ziah a nih hnua Mizoram sorkar lailawkah chief minister a ni a, kum 1987-a Mizoram state Assembly inthlan hmasa berah Sateek leh Aizawl North-II bialah tlingin, chief minister a ni leh a, a kaihhruai sorkar chu kum 1989-ah tlain, term an hmang zo lo.

Kum 1990-ah cancer a nei tih hmuh chhuah niin, Memorial Sloan Kettering Cancer Centre, USA-ah thla thum enkawl a ni a, Mizoram pana an haw kawng Ashford Hospital, London-ah July 7, 1990, India sanaa tlai dar 2:30-ah a thi. A ruang chu July 11, 1990 zanah an in thlenpui a ni a, July 13-ah vui niin, tun thlengin Mizorama state funeral-a vui awm chhun a la ni.