Duty-te inthlahdul deuha hriat vangin Kolasib Joint VC-in lockdown an duh

Kolasib Joint Village Council chuan Covid-19 chungchanga duty-te an inthlahdul deuha an hriat avangin nimin khan Kolasib DC Dr H Lalthlangliana hnenah Kolasib khawpui chhungah chawlhkar khat chhung total lockdown kalpui leh turin an ngen.

Vanglaini palai zawhna chhángin Kolasib Joint VC hruaitute chuan, hun a rei deuh tawh avangin village task force leh sorkarin a ruat executive duty-te chu an inthlahdul deuhin an hria a, chuvang chuan total lockdown kalpui mai an duh thu an sawi a, "Khawpui chhungah executive duty-te awm mah se, páwna chhuakte'n VTF aṭangin phalna an neih leh neih loh pawh an endik ngai meuh tawh lo a ni," an ti.

Kolasib Joint VC chuan, executive duty-te chu khauh taka duty turin DC pisa aṭangin hriattir ni ṭhin mah se, a sâwt mawh viaua an hriat thu sawiin, "Hetiang ringawta kan kal a nih chuan nasa zawka hripui a darh kan hlau a ni. Chuvangin, kar khat tal total lockdown neih leh hi ṭha kan ti a ni," an ti a, an ngenna chuan rah ṭha chhuah ngei se an duh thu an sawi.

Kolasib Joint VC-te chuan, total lockdown chu magistrate lam ngaihtuah tur a nih angin, an lo ngaihtuah tur thuin Kolasib DC-in a lo chhàn thu Vanglaini an hrilh.