NHM hnuaia thawkte ngaihsak turin ZPM Ṭhalaiin Mizoram sorkar an phût

ZPM Ṭhalai chuan thuchhuah siamin, Mizorama National Health Mission (NHM) hnuaia thawk mi 2,175-te hlawh pe tur leh ngaihsak turin Mizoram sorkar an phût tih an tarlang.

NHM hnuaia thawkte chu an hna pangngai bakah Covid-19 kaihhnawihah sorkarin a hmang hle tih sawiih ZPM Ṭhalai chuan, "Rim taka thih ngam lu púa an thawh laia thla hnih lai hlawh la loa an awm hi pawi kan ti a, hlawh an lâk thuai theih nan hma la turin Mizoram sorkar kan ngèn a ni," an ti.

ZPM ṭhalaite chuan, "NHM hnuaia thawkte hi hripui do kawngah a rál hmatáwng an nih laia an zingah Covid-19 kái an awma an inenkawlna sênso anmahni intumtír an ni leh zel hi thil fel lo tak niin kan hria," an ti a; NHM hnuaia thawktute zingah hripui vei an awmin, a thlâwna enkawl an nih theih nan ruahmanna siam turin thuneitute an phût tih an sawi.

Hripui avanga thih ngam lu púa thawktute chu ngaihsak tur leh an himna tur ruahmana chhawmdawl tura sorkar an duh thu sawiin ZPM Ṭhalai chuan, "Central sorkarin kum 2011-a thuchhuah a neih tawh, state sorkarin plan felfai tak siama kum 5 thawk tawh chin regularise tura a tih tawh dung zuia chak zawka hma la turin Mizoram sorkar kan phût bawk," an ti.