MPYCC-in ASF tuarte zángnadawmna Pe thuai turin Mizoram sorkar an phût

Mizoram Pradesh Youth Congress Committee chuan, African Swine Fever (ASF) vanga vawk thi neitute chu zangnadawmna pe thuai turin Mizoram sorkar an phût.

MPYCC chuan thuchhuah siamin, March 21, 2021-a Lungsen khuaa ASF vanga vawk a thih aṭanga tun thlenga Mizorama vawk 9,000 chuang a thih hnuah pawh Mizoram sorkarin zangnadawmna a la pe lo chu pawi an tih thu an tarlang a, "Vawk vulhtute tawrhna hi thla thum lai a liam hnuah pawh Mizoram sorkarin a la ngaihthah reng a. Mipui harsatna ngaihthah reng lo hian zangnadawmna rang takin pe rawh se," an ti.

Lungsen khuaa ASF a lèn tirh lamah bialtu MLA ngenna angin AH&Vety minister Dr K Beichhua'n Vety doctor-te hruaiin a hmunah a endik tih sawiin MPYCC chuan, Minister hian zangnadawmna pek tur a puang dawn emaw mipuiin an tih laia zangnadawmna pek tur a awm loh thu a puang ta zawk chu beidawnthlak an tih thu an tarlang.

Congress party chuan, Congress sorkar laiin Mizoramah vawk pûl hri a léng tawh ṭhin tih sawiin, "Mipuiin nasa taka tuarin state dang leh ram pawn aṭanga vawk lak luh khuahkhirh a ni tawh ṭhin. Mipui harsatna hriaiin Congress sorkarah khan vawk pûl hri tuartute chu zangnadawmna pek ṭhin a ni. Congress sorkar laia zangnadawmna pek theih a nih chuan tun sorkar pawh hian a tuartute ngaihthah loin chak takin hma la rawh se," an ti.