Minister-in department hotute a kâwm

Minister of state TJ Lalnuntluanga chuan nimin khan Champhai DC conference hall-ah agriculture leh a kaihhnawih department hrang hrang hotute a kâwm a, hmalakna leh hmachhawpte a sawipui.

TJ Lalnuntluanga chuan, Covid-19 lêng avangin hmasawnna ruhrel khawih leh hma­chhawpte tihpuitlin a har rih thu sawiin, "Tun hunah hian thlen chin aṭanga hmalakna leh hmachhawp awmte inhrilh leh bawhzui ngaite ngaihtuah tura inkoh khawm a ni a, in lakah mipuiin beiseina sang tak an nei tih hriain theihtawp chhuah ang che u," a ti a; hun tawn leh thil inthlak danglam mil a inher danglam thiam turin department hotute a chah.

Agriculture leh a kaih­hnawih department dangte chu mipui náwlpui ei bél leh innghahnate a nih thu sawiin Minister chuan, "Mipuiin hamṭhatna an hmuh turte leh an ṭangkaipui turte hriattir leh hma laksak kawngah tun aia nasa zawka pên chhuah a ngai," a ti .

Minister TJ Lalnun­tluanga hian nimin vek khan Champhai District Hospital leh Champhai Vengthara Urban Primary Health Centre-te a tlawh a, Covid-19 laka invênna hmanraw chi hrang hrang a pe. Champhai District MJA member-te nen DC conference hall-ah an inkâwm a; Lallianthangi, Zotlang hnenah kum 100 tlin lawmpuina thilpek a hlan bakah, Covid-19 vei damlo pitar enkawltu CT Ramnunmawii, Ruantlang hnenah tawlhloh puan a hlân bawk.