Convention Centre hmun tura Harsatna ngaihsak loah sorkar puh

MNF party chuan thuchhuah siamin, Khatla-a Aizawl Con­vention Centre sakna tur lei laih vanga harsatna thleng chu ngaihsak loah sorkar an puh.

Convention Centre sakna tur hmun hi January 13, Inrinni khan MNF MLA pahnih - Vanlalzawma leh Lalruatkima te, bial­tu councillor Lalhming­mawia, Khatla Local Council member-te leh Aizawl West-III MNF Block hruaitute'n an tlawh. Lalruatkima chuan, Conven­tion Centre sakna tura hna thawh­­naah Mizoram sorkara thil ti thei tak ṭhenkhatin hlâwkna an tél niin a sawi.

Sorkarin a dan siam a bawhchhia nia sawi­in Lalruatkima chuan, "Aizawla in sa turte'n AMC Building Regulation angin phalna an lak a ngaih laiin, sorkar hian Convention Centre sak hma hian permission an la lo a, a leilung a him tawk em tih hriat fiah hmasak nan soil testing tih mumal a ni lo. April 5, 2017 khan PRISM-in RTI Act hmangin DPR copy an dil a, sorkarin a pe phal lo a, thup nei chungin Centre hi an sa a ni," a ti.

Lalruatkima chuan, ruahmanna ṭha tawk siam hmasa loa lei laih a nih avangin harsatna naménlo a thleng nia sawiin, "A chhak lama Bible House building ṭhiah a ngai hial a, Baptist House pawh dinhmun hlauhthawnawm taka a lo awm ta a ni," a ti a; kawngpui pawh a zatve a min phah niin a sawi.

Kawngpui min vanga mihring kalna atana thing hmanga lei siam chu thir hmanga siam theih leh harsa lo a nih thu sawiin Lalruatkima chuan, "Aizawl chhim lam leh Aizawl West-III mipuite châk lâkna leh veivahna kawnga harsatna tawh mek hi a rang lama sukiang turin sorkar hian hma a lak thuai a ṭul tak zet a ni," a ti.

Lalruatkima sawi danin, Convention Centre sakna tur hian Circuit House building chu ṭhiah a ni a, Special Plan Assistance (SPA) 2014-2015 hnuaiah estimated amount cheng nuai 2499.99 ruahman a ni. A satu tur contractor chu P Lalbiaka (minister hlui), first class contractor hmingin Lal Chungnunga, Leitan, MPCC general secretary a ni a; April 2019-a sak zawh tura tih a ni.