Myanmar ramri bulah Myanmar sipaiin Sabualtlang khaw mi an kâp hliam

Lawngtlai district-a Myanmar ramri depa awm, Sabualtlang khuaah Monondo (67) chu January 12, 2018 chawhnu khan Myanmar sipaite'n an kâp hliam.

Thu dawn danin, Monondo leh a nupui Banati chu Sihlui-ah anchiri zawngin an kal a, luia an awm laiin Myanmar sipaite'n hel emaw tiin an kâp a ni. Sipaite hian Monondo khûp ding lam ruh an kah tliah bakah, a malpui vei lam an kâp thlêr a ni.

Banati sawi danin, Myanmar sipaite'n an kah lai hian Monondo nupui chuan hel pawl an nih loh thu leh India mi an nih thute ring taka auin a sawi a, chumi hnuah chuan Myanmar sipaite chuan Monondo te nupa chu a hmuna kalin an en a, damdawi, ei tur tlem azawng leh hmeh-ên (torchlight) pein an kalsan a ni.

Sabualtlang YLA chuan thil thleng an hriat veleh Monondo chu an zâwn haw a, January 13, Inrinni zing khan Lawngtlai District Hospi­tal thlenpui niin, enkawl mek a ni.

Monondo enkawltu Dr Biakvela chuan, Monondo chu a thisen (blood pressure) a hniam thu te, thâwk lamah harsatna a neih thu te, a dinhmun a ziaawm veleh hmunpui lam pana thawn a ngai tur thute a sawi.

Sabualtlang bialtu MDC KC Malsawmdawngliana pawhin Monondo chu damdawi-inah a kan a; a inenkawlna senso zawng zawng a tumsak dawn thu a hrilh.

Monondo kahna hmun hi January 12 zan khan Tuithumthar camp-a awm Assam Rifles sipaite leh Bungtlang South-a awm police-te'n an pan nghal a, thil awm dan an enfiah a ni.