KHAWTHLIR

Pastor bial hawng
Mizoram Presbyterian Kohhran chuan nimin khan pastor bial thar pakua an hawng. Pastor bial thar siamte hi kum 2017-a Synod Inkhawmpui thurel bawhzuina a ni a; Mizoram chhungah bial panga leh Mizoram pawnah bial pali hawn a ni.

Thisen pe
Chanmari Branch KṬP chuan January 13, Inrinni khan an kohhran hall-ah blood donation camp an huaihawt a, mipa 48 leh hmeichhia panga-in Synod Hospital tan thisen unit 53 an pe.

Leiminin chhilh
Kaizasanga (20) s/o Kamzasuana, Khawkawn, Champhai district chu January 13, Inrinni chawhnu dar 3 vel khan Dawrpui Vengthara in hmun tur laia hna an thawhnaah leiminin a chhilh a, a hmunah a thi. Kaizasanga hi Republic Higher Secondary School-a pawl 12 zirlai a ni a, Edenthar Venga khawsa mek a ni.

Sikpui Fehchhuah
MNA ṭhalaite chuan Janujary 13, Inrinni khan Seling leh Thingsulthliah khuaah ‘Sikpui Fehchhuah’ an buatsaih a, MNYF president Lalrinawma, MLA leh MNF MLA dang K Sangṭhuama ten thu an sawi. Sikpui fehchhuahah hian Aizawl aṭangin MNYF hruaitu eng emaw zat an tel a ni.

Lawm dawn
Electric Veng Middle School, Aizawl chuan naktuk hian an kum 50-na, golden jubilee Electric Veng YMA Hall-ah an lawm dawn a, sikula lut tawh zawng zawngte kal vek turin an sáwm. Jubilee lawmna hi School Education minister H Rohluna leh bialtu MLA Lal Thanzara, minister ten an hmanpui ang.

Pipe phûm dawn
SIPMIU (NERCCDIP) chuan January 15-22, 2018 chhung khian zing dar 9 leh tlai dar 5 inkarah Ramthar North thlanmual pêng aṭanga Chite road inkar kawngpui dungah tui pipe an phûm dawn a; hei vang hian lirtheia kawngpui hmangtute chu fimkhur leh hna thawkte ngaichâng chunga lirthei hmang turin Traffic SP-in a chah.