Jampui-Sakhan Baptist centenary lawm

Jampui-Sakhan Baptist Association (JSBA), Tripura chuan January 11, 2018 aṭang khan Vang­­hmun khelmualah an kum 100 tlin an lawm a, nizan khan a ṭiak.

Tripura-a Jampui tlangdungah Kristianna a luh hnuah Mizo khaw 11-te chu inzawm khawmin, JSBA an din a, JSBA centenary lawmnaa thupui chu 'Aw Pathian, Chanchinṭha min pe, lawmthu kan hrilh che,' tih a ni. Aizawl aṭangin Baptist Church of Mizoram (BCM) General Secretary, Baptist Choir leh Evangelical Church of Maraland (ECM) Moderator ten an hmanpui.

JSBA centenary lawm ṭan zanah centenary meidet hun an hmang a, Inrinni khan centenary lungphun an hawng. Centenary lawm chhung­in programme chi hrang hrang an hmang a, Inrinni tlai khan centenary ruai an ṭheh a ni. Nimin nilengin hun an hmang a, zanah centenary lawmna khàr­na inkhawm hman a ni.

JSBA-ah hian kohhran 11 awmin, member 4,500 chuang an awm mek a; missionary, pastor leh thawktu mi 34 an awm mek bawk.