Maharashtra aṭangin rawn thleng

Maharashtra-a Mizo tangkhangte chu Lumding leh Badarpur inkarah leiminin rél kawng a tihchhiat avangin nimin tlai khan Guwahati aṭangin Bairabiah bus-in phurh thlen an ni. 

Tangkhangte hi rél hmangin May 30, 2020 khan Mumbai aṭangin an rawn chhuak a, June 2-ah Bairabi thleng tura beisei an ni a; mahse, rél kawng a chhiat avangin Guwahati thleng an tlàn a ni. Mizoram sorkar leh Assam sorkar an indawr hnuah Thawhlehni zan khan Guwahati aṭangin bus 68 hmangin Bairabi panpui an ni a, nimin tlai khan Bairabi thlenpui an ni.

Rawn hawte hi Bairabiah enfiah (screen) loin, an inkhung hranna tur lam panpui nghal an ni a, an district ṭheuha quarantine centre-ah RTPCR hmanga endik turin an swab sample lak a ni ang.

Maharashtra aṭanga haw tur inhriattir zat chu mi 1,597 an ni a, Mumbai aṭangin mi 750 vel leh Pune aṭangin mi 700 chuang an ni. Haw zat chiah erawh chu he thu ziah lai hian bus-in Bairabi a la thlen kim loh avangin hriat theih a ni lo.

Assam aṭanga Mizoram mite rawn chuanna bus hmang hian Mizorama tangkhang Jharkhand-a haw tur hnam dang, rél kawng chhiat vanga Bairabia tángte chu Guwahati thleng an kal ve nghal a ni.