Lokayukta atan pisa tihfel a nih veleh A taka kalpui tura hmalak a ni ang - Lalsawta

Law & Judicial minister Lalsawta chuan, Lokayukta atan pisa luah tur an tihfel veleh Lokayukta chu a taka kalpui turin chak taka hmalak a nih tur thu a sawi.

Vanglaini palai zawhna chhangin Lalsawta chuan, Lokayukta atan hian pisa luah tur zawngin tender-te an chhuah thu a sawi a, "Vawi hnih kan chhuah hnuah pawh pakhat chiahin a rawn chháng a. Pisa luah tur kan hmuh hi sorkar lamin a to an tih deuh kan hlau a ni," a ti.

Hetih lai hian Lalsawta chuan, pisa luah tura an hmuh chhun chu luah a nih ngei theihna atan a ṭul anga hma la tur leh staff tur lak hna pawh a rang lama buaipui turin Law & Judicial department officer-te a hrilh nghal a ni.

Lalsawta chuan, pisa luah tur an tihfel veleh Lokayukta kalpui turin chak taka hma an lak tur thu sawiin, "Pisa neih hma chuan hmalak hleih theih a ni lo," a ti.

Lokayukta chairman leh member atan Search Committee-in an zir­chian hnuah ṭha tura an ngaihte list Selection Committee-ah an thehlut tawh a, thlan fel a la ni lo. Selection Committee-ah hian chairman chu Chief Minister a ni a, member-te chu Speaker, Gauhati High Chief Justice emaw a aiawh leh, Assembly-a oppostion group leader-te an ni.

Law & Judicial depart­ment chuan December 2016 kha thu­chhuah siamin, Mizoram Lok­ayukta-a chairperson leh member atana duh neite tan January 31, 2017 thleng rawtna thehluh theih a nih thu a tarlang a ni.

Lokayukta dinna atan hian Mizoram sorkar chuan kum 2016-2017 budget-ah khan cheng nuai 159.34 dah a ni.