Secretariat-ah blood donation camp
Association for Voluntary Blood Donation (AVBD) leh Secretariat Administration Department (SAD) chuan, vawiin leh naktuk hian Secretariat building kawt záwlah thisen pek rûnpui, blood donation camp an buatsaih dawn a; New Secretariat Complex-a thawkte leh office dawrtu a remchang apiangte thisen pe turin an ngen.
Secretariat kawt záwla blood donation camp huaihawt tur chungchangah hian SAD secretary B Lalthanliana chuan January 12, 2018 khan Circular a tichhuak a; blood donation camp chu January 16 & 17 chawhma dar 10 leh chawhnu dar 1 inkarah buatsaih a nih tur thu tarlangin, "Mizoram Secretariat-a thawktute leh office dawrtu a thei apiang tan thisen pek theih a ni ang," tiin a tarlang.
SAD Circular chuan, Mizoramah thisen mamawhna a sang zel tih sawiin, Aizawla private hospital hrang hrangte thisen mamawh pawh Aizawl Civil Hospital blood bank aṭangin pek chhuah reng a ni tih a tarlang a, "Ni tin thisen unit 100 - 120 inkar pek chhuah reng a ni. Kum tin Krismas leh kum thar vuakvêtah thisen mamawhna a sang ṭhin a, chutih laiin thisen petu an tlem hun lai a ni bawk. Tun dinhmunah blood bank-ah thisen dah khawl sa a awm mang lo a, thisen petu tur zawn chawp a ngai ta a ni," a ti.
AVBD hruaitute hnen aṭanga thu dawn danin, Secretariat kawta blood donation camp huaihawt tur hi vawiin chawhma dar 10 hian chief secretary Lalmalsawma'n a hawng dawn a ni.