Zoram siam danglam kan tum - Zoramthanga

MNF chuan an party pisa, Mizo Hnam Rûn chu kum 2018 atan nimin khan an hawng a; hawnna inkhawmah MNF president Zoramthanga chuan, sorkarna an chan hunah Zoram siam danglam an tum thu a sawi.

MNF President chuan, kum 2017 chu India ramah mihring zat aṭanga chhûtin Mizoram chu zu vanga thi tamna ber, ruihhlo vanga thi tamna ber, hmeithai tamna ber leh ruihhlo tawlh luhna kawnga hman nasat ber niin a sawi a, "Zu leh drugs-in kan nunna a la tam ta lutuk hi tireh turin zu zawrh kan khap dawn. Eizawnna mumal neih loh vanga Rangvamual leh hmun hrang hranga zu zuar ṭhinte hi eizawnna

ṭha leh hlawk kan siamsak ang a, zu zawrh an peih tawh lo ang," a ti.

Zoramthanga chuan, MNF-in sorkarna a chan laia an thil tihfel loh tam takah thawktu te, hnam sipai te, martarte leh an chhungte leh mipui chungah ngaihdam a dil a, "Sorkar leh veleh an tan engkim ti turin kan inpeih fel tawh," a ti a; MNF dintu Laldenga (L) hmachhawpte tipuitling a, sorkar thar ṭha tak siam tura theihtawp chhuah turin mipui a sáwm.

Kuminah Assembly inthlanpui a awm dawn tih sawiin, "Pathian leh mipui zarah kan sorkar chuan kalphung thar leh Zoram thar ṭha tak kan siam ang. Rorel dan tharah chuan mipui hnenah thuneihna lian zawk pein kan kalpui dawn," a ti a; MNF party constitution pawh thlak danglamin, malsawmna an dawnte rualkhai zawka mipuiin an chan theih dan tur an duang chhuak tawh niin a sawi.

Zoramthanga chuan, "Sorkar thar kan siam hunah chuan mipui eizawna ngêlnghet leh hlâwk zawk, kum tina a nuai téla sum an lak luh theihna tur kan siamsak ngei ngei dawn. Ṭhalaite eizawnna leh hmasawnna ṭha zawk kan siamsak bawk ang," a ti. Mipui sum lak luh a pun chuan sorkar hna tênau inchuhna a bo phah thei dawn a, kohhrana sum thawh pawh a pung dawn tih sawiin, "Missionary kan intir chhuak tam thei ang," a ti.

MNF President chuan, "Mizo­ram kawngpuite ṭha leh tlo law law, kum 20 chuang daih turin Zoram hmun pawimawh tlawhpawhtir vek kan tum a ni," a ti a; sikul ṭan hun chu sawn tlai an tum thu a sawi bawk.

Mizo Hnam Rûn hawnna in­khawm hi MNF senior vice presi­dent Tawnluia'n a kaihuai a; Mizo hnam tana martarte sûn nan minute khat chhung ngawi renga an din bakah, an ṭawngṭai rual a ni.