KHAWTHLIR

Lehkhabu tlangzarh
Dr Rosy Lalmalsawmi Khuma lehkhabu buatsaih, ‘Tuihna : KC Lalvunga aṭanga lo pût’ tih chu nimin khan chief information commissioner Lalduhthlana Ralte-in Aijal Club-ah a tlangzarh. Lehkhabuah hian Mizo zinga Indian ambassador hmasa ber KC Lalvunga (Zikpuii Pa) mimal nihna leh India ram palai nihnaa a tawnhriatte tarlan a ni.

Press tour
NEDP hnuaia Mizoram sorkarin press tour a buatsaihah nimin khan Kolasib leh Mamit district-a MJA member-te chu an zin chhuak. District pahnih MJA member-te hian Champhai district-a pipute sûlhnu hmun hrang hranga mi an tlawh dawn a ni.

MNF nomination committee
MNF president Zoramthanga chuan kum 2018-a Assembly inthlan awm tura candidate siamtu tur Nomination Committee nimin khan a din. Nomination Committee-ah hian chairman chu Zoramthanga a ni a, member secretary chu Lalliankima a ni. Member dangte chu elected office bearer-te bakah, Lalchamliana, K Sangṭhuama, Lalrin-chhana, Lalthlengliana, F Lalthlamuana leh Lal-ruatkima te an ni.

Tlân phal lo
Traffic SP C Lalthanmawia chuan thupek chhuahin, PWD-in kumin January 18 aṭanga February 18 chhungin zing dar 9:30 aṭanga tlai dar 4 inkarah Falkland aṭanga Chite kawng siam hna an thawh dawn avangin, kawng siam hun chhungin he kawngah hian lirthei tlan leh hna thawh tibuai thei turin kawng sirah lirthei dah phal a nih loh thu an tarlang.

Judicial Service
R Lalṭhazuala, District & Sessions judge (Rtd.) lehkhabu ziah 'The Mizoram Judicial Service' tih chu nimin khan Agriculture conference hall-ah dy. chief whip RL Pianmawia'n a tlangzarh. Lushai Hills district lo awm ṭan aṭanga Mizoram Judicial Service a rawn pian dan te, Separation of Judiciary hman anih dante leh tun thlenga Mizoram Judicial Service member-te chanchin ziahlan a ni.