Kum 2018-a Assembly inthlan awm tur Duhoma'n sual leh tha indonaah a puang

Zoram Nationalists' Party (ZNP) chuan an pisa chu kum 2018 atan nimin khan an hawng a; an president Lalduhoma'n thu sawiin, kum 2018-a thil inthlâkthleng tura an duhte zinga pawimawh tak chu sem policy aiah thawhrimna a nih thu a sawi a, kum 2018-a MLA inthlan awm tur chu sual leh ṭha indonaah a puang.

ZNP President chuan, kum 2018 chu kum narân ni loin, Zoram tana hun chhinchhiah tlak, ngaihhlut zawng thlenga thlâkthlengtu tur sorkar kalphung thar pian kum a lo nih theih nan phûr ṭan la turin mipui a sáwm a, "He kuma thil inthlakthleng awm tura kan duhte zinga pawimawh tak chu sem policy aiah thawhrimna a ni," a ti.

Lalduhoma chuan, MNF kum 10 an sorkar chhunga an policy Mizoram Intodelhna Policy (MIP) hmangin mi 50,547 hnenah sum an sem hman tih sawiin, "BPL zir chiangtu Tendulkar Committee report-in a tarlan danin, kum 2005-ah Mizoramah BPL chhungkua 1,50,000 an awm a, kum 2010-ah 2,40,000 an tling hman a. Kum nga chhungin BPL chhungkua 90,000 ngawtin an pung a ni," a ti a; MIP chu 'Project hlawhchham ve thiang lo' tiin sawi mah se, a hlawhchham chiang hle tih a sawi.

Congress sorkar pawhin NLUP hmangin term hnih chhung sem policy uar zawkin an chhunzawm tih sawiin Duhoma chuan, Congress ṭhalai thuchhuah tarlan dan chuan, NLUP chu chhungkaw 1,31,521 hnenah sem tawh a ni a, cheng vbc. 2800 sen a nih thu a sawi a, "Chhungkaw tin dawn zat chu chawhrualin Rs. 2,12,893 a ni. Mahse, tuma'n chutiang zat chu an dawng si lo. Cheng nuai khat zela hisap chuan vbc. 1,315 a ni a, mipuia lut ve ta lo chu vbc. 1485 lai a ni," a ti.

Lalduhoma chuan, sum sem chu kohhrante pawhin ṭha an tih loh thu an aupui reng chungin, Congress leh MNF party-te chuan chhunzawm zel an la tum tih sawiin, "Congress-in MLA bial tinah NLUP/NEDP hnuaiah chhungkaw 200 ṭheuh thlan an tum mek a, MNF pawhin a báa vote lei nan Rs. 3,00,000 an zuar mek bawk," a ti. Sum sem chu mipui hmangaih vang ni loin, vote ît vang a nih thu sawiin, "MIP leh SEDP te, NLUP leh NEDP-te hi 'Politics Aiáwt' an ni," a ti bawk.

ZNP President chuan, mi retheite din­chhuah tak takna tur ngaihtuah duh si lo a, a vir tâwk leka enkawl a, an retheihna remchanga hman chu ṭangrual pawl ZPM chuan sual rapthlak takah an ngai tih sawiin, 'Tu pawh sorkar se, engmah an ni chuang lo ang' tih rilru pu khawpa beidawnnaa mipui hnûk luttute chu paihthlak an tum tih a sawi a, "Kumina inthlanna lo awm tur hi sual leh ṭha indona, Indona Thianghlimah ka puang e," a ti.

ZNP pisa hawnna inkhawmah hian ZNP telna Zoram Peoples' Movement (ZPM) general secretary K Sapdanga pawhin thu sawiin, inthlan kum a nih angin, an hmanrua pawimawh ber tur chu mite khawngaihna dil a nih thu a sawi a, “Kum tam tak chhung lo sorkar tawhte hnungah bul kan ṭan ve a, Mizo mipui khawngaihna kan ngen tak meuh meuh a ni," a ti. ZPM Steering Committee chairman Lalliansawta'n thu a sawi bawk.