Health Minister hoin MIMER dinna atana hmalaknate sawiho

Mizorama medical college din tum, Mizoram Institute of Medical Education & Research (MIMER) atana hmalakna leh hmachhawpte nimin khan Health minister Lal Thanzara hoin CMO conference hall-ah sawiho a ni.

Health Minister chuan, MIMER chu tun dinhmunah leh hun lo kal zel turah thil ṭangkai tak leh mipui tan hamṭhatna tam tak thlen thei tur a nih avangin hawn thuai a nih theih nan sorkar chu a hmanhmawh a, theih­tawp chhuah a nih thu sawiin, "Hemia mawhphurtu department leh mimal pawh theihtawp an chhuah ka beisei," a ti.

Medical college din tura hmalakna endiktu Medical Council of India-in report an siam chu ngun taka ngaihtuah a, medical college atana mamawh hrang hrang hlen chhuah tur an beiseite chu tihhlawhtlin thuai a nih theih nan meeting-a telte chu theihtawp chhhuah turin Minister chuan a sáwm a ni.

Medical Council of India (MCI) chuan November 21-22, 2017 khan MIMER behchhan tur State Referral Hospital chu an enfiah tawh a, an report chu December 14, 2017 khan IMC Executive Committee-in a ngaihtuah leh ni.

Nimina meeting-ah hian principal adviser to chief minister RL Rinawm­a, Health secretary Lalrinliana Fanai, Health principal director Dr F Lallianhlira leh MIMER advisor Dr NK Mohanty te an tel.