Solar power siam turin Mizoramin Theihna a nei tih finfiah a ni - CM

Mizoram sorkarin February 8, 2017-a a lo pawm tawh, 'Solar Power Policy of Mizoram 2017' chu nimin khan CMO conference hall-ah sawiho a ni a; meeting kaihruaitu chief minister Lal Thanhawla chuan, ni zung chakna hmang kawlphetha (solar power) siam chhuak turin Mizoramin theihna a nei tih finfiah a nih tawh thu a sawi.

Chief Minister chuan, ram changkang zelah kawlphetha mamawhna a sang zel tih sawiin, "A siam chhuah kawngah pawh leilung hausakna tirîral lo leh boruak tibawlhhlawh lo thei ang ber zawnga hmalak khawvelin a ngaih pawimawh em avangin India sorkar pawhin thui takin ruahmanna a siam a ni," a ti.

Kawlphetha thianghlim a ngaih, nizung leh thli chakna hmanga kawlphetha siam chhuak turin vanneihthlak takin Mizoramin theihna ṭha tak a nei tih finfiah a nih zel thu sawiin CM Hawla chuan, "Technology hmasawnna avangin solar energy siam chhuak tura senso pawh a hautak lo sâwt hle a ni," a ti a; Mizoram khua zawng zawng kawlphetha a thlunzawm vek tumna kawngah solar power-a hmalak a pawimawh thu a sawi.

Ni zung leh thli chakna hmanga kawlphetha siam chhuak tura hmachhawp awmte chu hlen chhuah vek a nih theih nan a mawhphurtute, a bik takin Zoram Energy Development Agency (ZEDA) leh Power & Electricity department-te chu theihtawp chhuah turin Chief Minister chuan a chah.

ZEDA director David Ramnunsanga sawi danin, National Institute of Solar Energy, Ministry of New and Renewable Energy hnuaia survey-in a tarlan danin, ni sat ber laia ni zung chakna hmanga kawlphetha Mizoramin a siam chhuah theih zat chu megawatt 9,090 a ni a; Solar Power Policy of Mizoram 2017 hnuaiah hian kum 2022 ral hmain a tlem berah megawatt 80 siam chhuah tum a ni.

Solar power siam chhuak tura hmalakna pakhat atan sorkar hnuaia department leh institution hrang hrang builiding-ah ‘Solar Rooftop System’ dah tum a ni a; chuta tan chuan sorkar department tinte'n anmahni sum ṭheuh an hman a ṭul dawn.

Beisei anga solar energy sysytem bun theih a nih chuan kum khatah kawlphetha unit 5,890,224 siam chhuah beisei a ni a, chu chuan sorkar sum cheng nuai 212 chuang a hum thei dawn a ni.

Solar Power Policy kalpuitu Nodal Agency chu ZEDA a nih angin, solar power project kaihhnawih reng reng chu ZEDA kaltlang zela buaipui tur a ni.